Qyrym parlamentiniń vitse-spikeri Vladimir Bobkov Eýropalyq odaq Kerch buǵazyndaǵy qurylysqa qatysty saiasi oiynyn toqtatyp, eki túrli standart saiasatynan bas tartýy qajet ekenin aitty, dep habarlaidy Sputnik agenttigi RIA Novosti portalyna silteme jasap.
Dúisenbi kúni Resei prezidenti Vladimir Pýtin Qyrym kópirinde jolaýshylar tasymaly qyzmetin resmi túrde iske qosqan bolatyn. Sondai-aq, munda júk tasymaly qyzmeti 2020 jyldyń 1 shildesinde óz jumysyn bastaidy.
Osydan soń Eýropalyq odaqtyń syrtqy bailanys qyzmetiniń resmi saitynda málimdeme jariialandy. Onda "Resei tarapy temirjol qyzmetin iske qosý arqyly Ýkraina egemendigi men onyń aýmaǵynyń birtutastyǵyn taǵy bir ret buzǵanyn dáleldedi" dep jazylǵan.
Alaida Vladimir Bobkov bul pikirmen múldem kelispeidi.
"Ball nemese bonýs alý úshin Qyrym kópirine qatysty saiasi jáne diplomatiialyq oiyndy toqtatatyn kez jetti. Kerch buǵazy arqyly kópir salý – tarihi oqiǵa, ony moiyndaý kerek. Resei infraqurylymdyq turǵyda taǵy bir qadam alǵa basty", - deidi Qyrym parlamentiniń vitse-spikeri.
Onyń pikirinshe, Eýropalyq odaq eki túrli standart oiynyn júrgizip otyr.
"Mysaly, eýropalyqtar mundai infraqurylymdyq jańalyqtarǵa qýanatyn (Daniia men Shvetsiia arasyndaǵy Eresýnn kópiri). Alaida qazir olar ókinip otyr. Bul – eki túrli standart saiasaty. Mundai mańyzdy jańalyqty, iaǵni kópir qurylysyn minýsqa teńeý túsiniksiz. Sondyqtan Eýropalyq odaqtyń málimdemesi qara nietpen aitylǵan siiaqty", - dedi Vladimir Bobkov.
