16 myńǵa jýyq qazaqstandyq kópbalaly otbasylar úshin taǵaiyndalatyn járdemaqyny proaktivti formatta aldy, dep habarlaidy QazAqparat.
Ótken jyldyń mamyr aiynan bastap áielderge tórtinshi nemese odan da keiingi balany týǵan kezde taǵaiyndalatyn kóp balaly otbasylar járdemaqysyn alý úshin HQO-ǵa júginý mindetti emes, memlekettiń ózi barlyǵyn qashyqtan SMS arqyly rásimdeýdi usynady.
Budan buryn atalǵan járdemaqyny resimdeý úshin HQO-ǵa baryp, ótinish jazyp, jeke kýálik, balalardyń týý týraly kýálikteri men neke qiiý kýáligi siiaqty qujattardy usyný qajet edi, al járdemaqy ótinish berilgen kúnnen bastap taǵaiyndalatyn.
«Otbasynda tórtinshi nemese odan keiin taǵy bala týylǵan jaǵdaida, proaktivti túrde balanyń týý týraly kýáligin, bala týý men onyń bir jasqa deiingi kútimine bailanysty beriletin járdemaqylardy ǵana emes, kóp balaly otbasylar úshin járdemaqyny resimdeýdi usynatyn SMS-habarlama da jiberiledi. Munda klienttiń SMS-ke kelisimi ǵana kerek. Qajetti málimetter memlekettik organdardyń aqparattyq júielerinen alynady. HQO-ǵa barýdyń qajeti joq», – deidi «Azamattarǵa arnalǵan úkimet» memlekettik korporatsiiasynyń basqarma tóraǵasy Ádil Qojyqov.
Kóp balaly otbasylar úshin járdemaqy 2020 jyldyń basynan bastap tólenedi. Tólemdi tórt jáne odan da kóp bala týǵan áielder ala alady.
Qazirgi ýaqytta bul járdemaqyny 487 myńnan astam qazaqstandyq otbasy alady. Onyń ishinde 63 437 áiel «Altyn alqa», 138 571 áiel «Kúmis alqa» iegerleri.
2022 jyly kóp balaly otbasylarǵa taǵaiyndalatyn járdemaqy mólsheri:
4 balaǵa 49 100 teńge;
5 balaǵa 61 383 teńge;
6 balaǵa 73 666 teńge;
7 balaǵa 85 948 teńge;
8 balaǵa 98230 teńge;
Kelesi ár balaǵa +4 AEK.
Aita keteiik, Qazaqstanda 4 jáne odan da kóp kámeletke tolmaǵan balasy nemese 23 jasqa tolǵanǵa deiin kúndizgi bólimde oqityn birge turatyn balalary barlar kópbalaly otbasy bolyp sanalady.
6 bala týǵan jáne tárbielegen kópbalaly analarǵa «Kúmis alqa», al 7 jáne odan da kóp bala týyp, tárbielegenderge «Altyn alqa» beriledi.
1414 nómirinen qyzmetterdi proaktivti túrde rásimdeýdi usynatyn sms-habarlamalardy alý úshin telefon nómiri mobildi azamattar bazasynda tirkelýi tiis.
Eger áiel qandai da bir sebeptermen SMS arqyly qyzmet ala almasa, ol burynǵydai HQO-ǵa júgine alady.
Tolyq aqparatty 1414 nómiri boiynsha bilýge bolady.
