Ómirlik qiyn jaǵdaida qalǵan azamattardyń nesielik borysh júktemesin tómendetý aktsiiasy qaita ótkizilmeidi. Bul jaiynda QR Prezidenti Ákimshiligi ótinishterdi qaraýdy baqylaý bóliminiń aqparatynda aitylǵan, dep habarlaidy "Ult aqparat".
«QR Prezidenti Ákimshiligi ótinishterdi qaraýdy baqylaý bólimine aryzdanýshylardan ómirlik qiyn jaǵdaiǵa tap bolǵan azamattar úshin nesie boiynsha borysh júktemesin tómendetý týraly suraqtar túsip jatyr. Osyǵan orai, Memleket basshysynyń tapsyrmasyna sáikes, bul shara birrettik tártippen júrgizilgendigin habarlaimyz», - dep atap ótedi QR Prezidenti Ákimshiliginen.
Aita ketsek, atalǵan aktsiia ekinshi deńgeili bankter men shaǵyn qarjy uiymdary kepildiksiz tutynýshylyq nesieleri boiynsha eseptelgen aiyppuldar men ósimpuldardy esepten shyǵarý týraly sheshim qabyldanǵan qazaqstandyqtarǵa qatysty boldy.
Sonymen qatar ómirlik qiyn jaǵdaida qalǵan qazaqstandyqtar, atap aitqanda, kópbalaly otbasylar; asyraýshysynan airylý jaǵdaiyna bailanysty tólem alatyn otbasylar; 18 jastan asqan bala jasynan múgedekter bar otbasylar; ataýly memlekettik áleýmettik kómek alatyndar; jetim balalar; 2019 jylǵy 26 maýsymdaǵy jaǵdai boiynsha ata-anasynan kámelettik jasqa deiin aiyrylǵan, 29 jasqa tolmaǵan, ata-ananyń qamqorlyǵynsyz qalǵan balalarǵa aktsiiaǵa qatysý múmkindigi berildi. Bir qaryz alýshyǵa negizgi boryshy men oǵan eseptelgen syiaqydan turatyn óteletin beresheginiń mólsheri 300 000 teńgeden aspaityn bolsa, olardy óteý jolymen kómektesýge sheshim qabyldandy. Bul rette kepilsiz tutynýshylyq qaryzdary boiynsha qaryz alýshylardyń jalpy bereshegi 2019 jylǵy 1 maýsymdaǵy jaǵdai boiynsha 3 mln teńgeden aspaýy tiis.
«Bul aktsiia 2019 jyly aiaqtaldy. Onyń qorytyndysynda jalpy somasy 115 mlrd teńgeni quraityn 554 myń azamattyń kepilsiz tutynýshylyq nesieleri boiynsha boryshtar esepten shyǵaryldy. Taiaý ýaqytta bul aktsiiany qaitalaý josparlanyp otyrǵan joq», - delingen taratylǵan aqparatta.
