Qaharly qudiret
Ol sońǵy 10 kún ishinde adamdardyń zyǵyrdanyn qainatty. Ásheiinde keshki astan soń ydys-aiaǵyn jýmai úndi, túrik serialdaryn qaraýǵa otyra ketetin «hanymdardyń» qolyna bir shelek kómir men shyrpy ustatyp qoidy. Kóshede jeldiń ótinde júrse de, kapron shulyq kietin qyzdardyń nápsisin táýbesine túsirdi. Túndeletip, kósheniń burysh-buryshynan tamaq qaldyǵyn izdep ketetin itterdi kúrkege tyqty. Kóshe boiynda tańǵy, túski, keshki ýaqyttarda adam aiaǵy kóp júretin jerlerde otyratyn baiyrǵy memlekettik qyzmetker, dáriger, býhgalter, mýzykant bolǵan jandardyń túr-túrin jinap bir lashyqqa tyqty.
Ara-arasynda qasqyrdyń ne jeldiń daýsy ekeni belgisiz terezelerdiń tyǵynynan anda-sanda án salyp qoiady. Bet qaryǵan yzǵardan qalyń better de uialyp, qyzaratyn boldy. Úi turǵyndarynan uialǵandyqtan daýyldy kúnderi kóppáterli turaqjailardyń tóbesi patyrlaýǵa kóshti. Kúndizgi tynyq kezde ún-túnsiz múlgip turady da, qarańǵy shymyldyǵyn jaza sala qaita ánine salady. Arasynda lirikalyq, birde rok, djaz, rep baǵyttarynda án salý úshin aspaptaryn sailap, uqsata almasyn baiqaǵan soń tynyshtala qoiady. Jazdy kúni inesin qadap shaǵyp alǵan aradai tula boiyńdy titirkendiredi. Mine, saǵan jaz boiy meni ańsap ediń dep, doly kúshine enedi. Qansha doly bolsa, tabiǵat pen qudaidyń aldynda óz ámiriniń ýaqytsha ekendigin bile me eken, áiteýir, túski saǵat úsh shamasynda kóńildenip, jyly nuryn tógedi.
Áne, ol taǵy da ashýyna mindi. Aialdamaǵa taiaý mańda aýyr sómkesin arqalap, jeńil kúrtemen jalań bas ketip bara jatqan boijetkenniń názik saýsaqtaryn qaýqarynan aiyryp, kózinen jas aǵyzdy.
Jasandy intellekt
Jas izdenýshi taǵy minezin tiǵan. Alǵashqyda ústel ústine qara jumystan kús-kús bolǵan qolyn qoiýǵa jasqanatyn. Tipti, kitap oqyǵanda syrtynan baidyń áieli dobaldai qoldaryn kórip qoiady ma dep qysylatyn. Álgi úidiń ózinen 3 jas úlken qyzy men anasynyń bir-birine sypaiy sóileitinine tańdanatyn. Ózi sekildi matrostardyń qylyǵy men bai balasynyń dárejesi jer men kóktei dep oilaityn. Endi mine, arada bir jarym jyl ótkende aqsúiekter áýletiniń syrttai bilimdi, órkeniet kóshinen qalmaǵan, ǵylym-bilimniń san salasyn jastaiynan bilip ósken aqsaýsaq jigitiniń nadandyǵyna qairan qalyp otyr. Ishinen «mynalardyń ýniversitetke alǵan bilim qaida ketken? Osynsha ýaqyt myna mendei matrosqa qaraǵanda joǵary tap ókili sanalatyn «zańqoilardyń erketotailary jasandy intellekt» eken» deýmen keń úidegi ortadan jiirkenip ketti.
Lashyqtan shyqqan aqyldylar
Ómirinde dál ózindei oilaityn adamǵa jolyǵarmyn, til tabysyp, sher tarqatýǵa turarlyq sátterde kósilip sóilermin dep oilamaǵan. Jańa tanysy odan da basqa jańashyl ideialarǵa basymdyq beretin dostarymen tanystyrdy. Qalanyń kedeilermen jan-jaqtan jinalǵan kelimsekter meken etetin shetki aimaǵyna barýǵa kúnniń ekinshi bóligin arnady. Spenserdiń kózqarastaryn talqylady.
Bir tańǵalarlyǵy, jańa tanysqan joldastarynyń barlyǵy joǵary oqý ornyn bitirmegen. Eshqandai dindi ustanbaidy. Biraq, jaratýshynyń baryna tylsym kúshtiń iirip áketetinine senedi. Keibiri orta bilimdi de tolyq almaǵan. Kópbalaly otbasynda dúiege kelip, 9-11 jasynan bastap teńizden nápaqasyn taýyp júrgen jastar. Árqaisysynyń kózinde ot pen alysqa jeteleitin úmit bar. Álsiz janǵan shyraqty sóndirip almas úshin ár aptanyń sońynda ózderin bolashaqtyń ziialy qaýymy sanaityn qara jumysshylar tar bólmege jinalady. Tańǵa deiin sóz jarystyrýdan, «uiqyny demalysqa jiberýden» taiynbaidy.
Kóz kamerasy
Jańashyldyq pen jasampazdyqty tý etken jastardyń aldynda ol ózin aqymaq kórsetti. Degenmen, aqymaq bolmady. Jai ǵana aqymaq bolyp kóringisi keldi. Sórede turǵan kitaptardy mysyqsha timiskilep, qupiia qazynanyń qulpyn ashqandai ańtarylyp júrdi. Dymyn bildirmei básekelesteriniń shamasyn baiqady. Ózimsingen adamdarǵa bótensimedi. Aýyq-aýyq qarsy aldyndaǵylardyń kózine qaraidy. Kim biledi, árqaisysynyń ishinde bir perishte, bir zulym jatqan shyǵar degen oimen kúdiktene kóz tastaidy. Kóz kamerasyna qolaisyz eshteńe túse qoimaǵan soń buryshtaǵy pianinony ermek etedi.
Qaitarymsyz eńbek
Sońǵy kúnderi tyǵyz kún tárbinen ábden tityqtady. Janary tóńkerilip, qyzara qaraidy. Túngi uiqyny sham jaryǵymen otyryp qaraityn eski qoljazbalarǵa aiyrbastaǵan. 4 saǵat uiyqtaǵan aty bolmasa, eshbir serialdan kem emes shym-shytyryq tústerdi kórip shyǵady. Ashyǵan miy da álsin-álsin solq ete qalǵanymen shydaýǵa úirengen. Ol da bir kúni teketireske toly eńbek maidanynda jarylyp ketýi múmkin. Qyzylińirden ústelge salbyraǵan basy tún jarymyna sheiin bir kóterilmeidi. Týra bir kúnge qarap ósetin kúnbaǵys sekildi. Uiqy shaqyryp, sana máńgire bastaǵanda, qaǵaz betin jaýlap alǵan áripter tym-tyraqai qasha jóneledi.
Shapaǵat SERDÁLI
.jpg)