Zerteýshiler Jankent qalashyǵynyń ishindegi úidiń birin ejelgi qalpyna keltirip, qaita jandandyrdy, dep habarlaidy "Ult aqparat" Qyzylorda oblysy mádeniet, arhivter jáne qujattama basqarmasyna silteme jasap.
Jankent qalashyǵy – Qazaqstannyń ortaǵasyrlyq tarihyn, sonyń ishinde túrki-oǵyz taipalarynyń tarihyn zetteýde tirek eskertkish bolyp tabylady. Bul eskertkishti 2005 jyldan beri «Halyqaralyq Jankent arheologiialyq ekspeditsiiasy» zerttep keledi. Arheolog, tarihshy, osteolog, topyraqtanýshy, arhitektor, geofizik, t.b. ǵalymdardan quralǵan ekspeditsiia keshendi arheologiialyq jáne pánaralyq zertteý ádisin paidalanyp keledi.
Aita ketetin jait, oblystyq biýdjet esebinen Jankent qalashyǵyndaǵy qazba jumystary 2014 jyldan bastap Qyzylorda oblysynyń mádeniet, arhivter jáne qujattama basqarmasynyń uiymdastyrýymen Qorqyt Ata atyndaǵy Qyzylorda memlekettik ýniversitetiniń «Arheologiia jáne etnografiia» ǵylymi-zertteý ortalyǵy tarapynan júrgizilýde.
«Jankent qalashyǵyndaǵy 2016-2020 jyldary birlesip júrgizilgen ǵylymi-zertteýdiń nátijeleri, qalashyq aýmaǵynda aspan asty mýzeiin uiymdastyrý, eskertkishti saqtap qalý jáne qaita-qalpyna keltirý jumystary tanystyrylyp, aldaǵy ýaqytta oblys aýmaǵyndaǵy arheologiialyq eskertkishterdi qala tiptes eskertkishterde qazba jáne barlaý jumystaryn júrgizý, monitoring, saraptama jasaý, óńirdiń ishki týrizmin damytý jáne týrizm kartasyna eskertkishterdi qosý, arheologiialyq park qalyptastyrý týraly ózekti máseleler baǵamdaldy.
Biylǵy qazba maýsymynda arheologiialyq zertteýlermen qatar, arhitektýralyq qurylystardy tumshalaý, qaita qalpyna keltirý jumystary da qolǵa alynǵan. Mysaly, eskertkish tsitadeliniń soltústik qorǵan qabyrǵasynda 5 munarasy arshylyp, jaýyn-shashynnan qorǵaý maqsatynda syrty saban jabyndymen jabyldy», delingen habarlamada.
№1 qazbada ornalasqan úidiń orny qalpyna keltirildi. Jalpy bul qazbanyń aýmaǵy kólemi 400 sharshy metrge jýyq bolatyn temir jabyndymen jabylǵan. Úidiń úsh turǵyn bólmesiniń qabyrǵalary jergilikti halyqtyń qurylys ádisine ainalǵan «karkasty» ádispen kóterildi. Bólmelerdiń tóbesi pashynmen jabylyp, bólme ortasyna terezesi ornatyldy. Bólmelerdiń ishine er jáne áiel adamnyń, balanyń músinderi daiyndalyp qoiyldy. Osylaisha, Jankentti zerteýshiler qalashyq ishindegi turǵyn úidiń ejelgi qalpyn qaita jandandyrdy.
Atalmysh jumystardyń nátijesinde, eskertkish aýmaǵyndaǵy úi-jailardyń, bólmelerdiń jaqsy saqtalǵandyǵyn baiqaimyz. Jankentti zertteýshi ǵalymdardyń pikirinshe, keleshekte osy baǵyttaǵy jumystar Jankent qalashyǵynyń aýmaǵynda arheologiialyq parkti qalyptastyrýǵa múmkindik beredi.
