Qazaqstanda konditsionerdi ruqsatsyz ornatqany úshin arnaiy aiyppul qarastyrylmaǵan. Alaida qurylǵyny ornalastyrý kezinde ǵimarattyń qasbeti búlinse, ortaq múlikti paidalaný tártibi nemese sáýlet talaptary buzylsa, páter iesi jaýapkershilikke tartylýy múmkin, dep jazady Krisha.kz saity.
Konditsioner ornatýǵa qatysty talaptar turǵyn úidiń salynǵan jylyna, jobasyna jáne qalada qabyldanǵan dizain-kodqa bailanysty erekshelenedi. Máselen, Almaty men Astanada ǵimarattardyń syrtqy kelbetin saqtaýǵa baǵyttalǵan talaptar qatań.
Jańa turǵyn úi kesheninde konditsionerdi qaida ornatý kerek?
Jańa turǵyn úi keshenderin jobalaý kezinde qurylys kompaniialary konditsionerdiń syrtqy blogyna arnalǵan arnaiy oryndy aldyn ala qarastyrady. Ol arnaiy qýys, sándik sebet nemese jabyq qorap túrinde bolýy múmkin.
Eger úidiń jobasynda osyndai oryn belgilense, syrtqy blokty tek sol jerge ornatý qajet. Ony óz betinshe basqa orynǵa aýystyrýǵa bolmaidy.
Keibir turǵyndar arnaiy qýystyń ishi qatty qyzyp, konditsionerdiń durys jumys istemeitinine shaǵymdanady. Mundai jaǵdaida aldymen basqarýshy kompaniiaǵa júginý kerek. Másele rastalsa, ol páter ieleriniń jinalysynda qarastyrylýy múmkin.
Al eger syrtqy bloktyń ornyn ózgertý ǵimarat qasbetine áser etse, bul sheshimdi sáýlet bólimimen kelisýge týra keledi.
Eski úilerde arnaiy ruqsat kerek pe?
Eski turǵyn úilerde, sonyń ishinde «hrýshiovka» úlgisindegi úilerde konditsioner ornatýǵa arnaiy ruqsat talap etilmeidi.
Degenmen úidiń syrtqy qasbeti barlyq páter iesine ortaq múlik sanalady. Sondyqtan konditsioner ǵimarattyń syrtqy kórinisin ózgertetin bolsa, ony ornatpas buryn MIB-pen, PIK-pen nemese basqarýshy kompaniiamen kelisip alǵan jón.
Bul keiin kórshiler tarapynan túsetin shaǵymdar men qurylǵyny basqa jerge kóshirý týraly talaptardyń aldyn alýǵa kómektesedi.
Qandai jaǵdaida másele týyndaýy múmkin?
Konditsionerdiń ózi aiyppul salýǵa negiz bolmaidy. Alaida ony ornatý kezinde:
- ǵimarattyń qasbeti búlinse;
- ortaq múlikti paidalaný erejesi buzylsa;
- qurylys jáne sáýlet normalary saqtalmasa;
- qurylǵy qatty shý shyǵaryp, kórshilerge kedergi keltirse, másele týyndaýy múmkin.
Mundai jaǵdaida páter iesinen zań buzýshylyqty joiý talap etiledi. Keide konditsionerdiń syrtqy blogyn basqa jerge aýystyrýǵa nemese tolyq alyp tastaýǵa týra keledi.
Konditsionerdi durys ornatýdyń joldary
Mamandar jańa turǵyn úi kesheninde turatyn azamattarǵa aldymen basqarýshy kompaniiadan konditsionerge arnalǵan arnaiy orynnyń bar-joǵyn anyqtaýǵa keńes beredi.
Al ekinshi naryqtan páter satyp alǵandar syrtqy blokty ornatpas buryn MIB-pen nemese PIK-pen keliskeni durys.
Sondai-aq konditsionerdi ǵimarattyń negizgi qasbetine ornalastyrmaǵan jón. Syrtqy blokty sándik sebetpen jaýyp, qubyrlar men elektr symdaryn kózge túspeitindei etip júrgizý qajet.
Jóndeý jumystaryn bastamas buryn kórshilerge eskertip, jumys aiaqtalǵan soń qurylys qaldyqtaryn jinap ketý de mańyzdy.
Almaty men Astanada talap nege qatań?
Almatyda 2024 jyldan bastap qala qurylysynyń dizain-kody qoldanylady. Qujatta ǵimarat qasbetteriniń syrtqy kórinisine, sonyń ishinde konditsionerdiń syrtqy bloktaryn ornalastyrýǵa qatysty talaptar belgilengen.
Astanada da osyǵan uqsas dizain-kod bar. Sondyqtan bul qalalarda konditsionerdi kez kelgen jerge óz betinshe ornatýǵa bolmaidy.
Basqa óńirlerdegi talaptar jergilikti erejelerge bailanysty. Eger qalada arnaiy dizain-kod bolmasa, qosymsha shekteýler qarastyrylmaýy múmkin. Soǵan qaramastan turǵyn úi, qurylys jáne ortaq múlikti paidalaný normalaryn saqtaý mindetti.
