Foto:elements.envato.com
Qonaev qalasynda masany qyrýǵa 45 million bólingen, al jergilikti turǵyndar narazy, - dep habarlaidy KTK telearnasy.
Telearna málimetinshe, qansorǵyshtar mazasyn alǵan Qonaev qalasynyń turǵyndary ákimdiktiń áreketsiz otyrǵanyna narazy. Sebebi shaharda jyl saiyn masamen kúreske qyrýar qarjy jumsalsa da, nátije joq.
Tipti, qalada odan beter masa qaptap, aýrý-syrqaý kóbeigen. Al sheneýnikter máseleniń sheshimi biyl tabylatynyna senimdi. Sebebi masany ýlaýǵa byltyrǵydan tórt ese kóp - 45 million teńge bólinipti.
Ústi-basyndaǵy bórtpelerdi kórsetken Marjan Áteevanyń qaptaǵan masadan ábden yǵyry shyqqan. Tuqymymen allergiiasy bolǵan soń, qansorǵysh ziiankesterdiń zardabyn birneshe jyl qatarynan tórt balasymen birge tartyp júr.
"Masa óte kóp. Sońǵy úsh jylda ulǵaiyp jatyr. Kishkentai edi, qazir úlken desem bolady. Terezemizdi asha almaimyz, ashsań, túnimen shaǵyp shyǵady. Balanyń uiqysy da, mazasy da ketedi. Túnimen qyshidy. Spirtpen súrtemiz. Basqa ne isteisiń?!" - deidi Qonaev qalasynyń turǵyny Marjan Áteeva.
Turǵyndardyń sózinshe, ásirese kún batqanda qiyn. Ymyrt ýaqyttan bastap dalada júrý múmkin emes. Sol úshin kóbi balasyn kúndiz de, keshke de dalaǵa shyǵarmaityn bolǵan.
"Kún jylyǵannan bastap qiyn. Óitkeni dalaǵa balalar shyǵa almaidy. Alty balam bar. Úide qamap otyramyn. Kúndiz jibereiik desek, kún ystyq, Túnde jibereiik desek, masa bar. Endi ne isteitinimizdi bilmeimiz", - Qonaev qalasynyń turǵyny Gúlnaz Ospanova.
Turǵyndar ákimdiktegilerdiń de ne istep júrgenin bilmeidi. Olardyń aitýynsha, masamen kúreske jyl saiyn qarajat bólinse de, esh nátije joq. Kerisinshe, kóbeiip ketken. Mysaly, byltyr masamen kúreske 10 million, biyl 45 million teńge bólinipti. Sóitip, sheneýnikter másele biyl sheshiletinine senimdi.
"Másele sheshiledi. Bizde qazir úsh merdiger uiym jumys istep jatyr. Jalpy 9 tehnika, onyń ishinde traktorlar, shashatyn tehnikalar bar. 15-ke jýyq túrli qurylǵylar bar. 30-ǵa jýyq mamandar jumys isteýde. Kópqabatty 278 úidiń de jertólesinde ýlaý jumysy júrgizildi", - deidi Qonaev qalasynyń TKSh, jolaýshylar kóligi, avtomobil joldary jáne turǵyn úi inspektsiiasy bólimi basshysynyń orynbasary Ashat Jeksenbekov.
Ákimdiktegiler byltyrǵydan tórt ese kóp qarajat bólinýin osylai túsindirip otyr. Iaǵni qarashanyń mazasyn qashyrǵan qansorǵyshtarmen kúreske biyl tyńǵylyqty kirisken. Negizinen, masanyń kóp bolýy Qonaev qalasynyń Qapshaǵai sý qoimasynyń jaǵalýynda ornalasýymen tikelei bailanysty. Sondyqtan atalmysh másele jylda kún jylysa kóteriledi.
