Áleýmettik meditsinalyq saqtandyrý qoryna qarasty Meditsinalyq kómek sapasyn monitoringileý departamentiniń direktory Lázzat Shomanova kompiýterlik tomografiiadan ótý qyzmetine qatysty shaǵymdarǵa túsinikteme berdi, dep habarlaidy QazAqparat.
«Elordada kompiýterlik tomografiiaǵa kezek bar ekeni ras. Nur-Sultan qalasy Densaýlyq saqtaý basqarmasynyń aqparaty boiynsha, elordadaǵy kompiýterlik tomografiia problemasy sheshilgen. Iaǵni, mobildi brigada naýqastardy kompiýterlik tomografiiaǵa aparyp, kúni boiy tomografiiadan ótýine múmkindik jasaidy. Tek ol úshin, emdeýshi dárigerdiń joldamasy bolýy kerek. Iaǵni, aldymen mobildi top kelip, temperatýra men satýratsiiany ólsheidi. Eger ókpeniń zaqymdanǵany týraly kúdik bolsa, onda kompiýterlik tomografiia tekserisi taǵaiyndalady», - dep túsindirdi Lázzat Shomanova Ortalyq kommýnikatsiialar qyzmetinde.
Qordyń ókili barlyq meditsinalyq qyzmetterdiń qoljetimdiligi qatań baqylaýda ekenin atap ótti.
«Barlyq ótinishterge jaýap beremiz, sondai-aq shaǵym túsken uiymǵa arnaiy baryp, jospardan tys monitoring júrgizemiz. Biz jaǵdaidy sol jerde sheshýge tyrysamyz. Proaktivti monitoring nátijesinde keibir jetkizýshilerde bul qyzmet joq ekeni belgili boldy. Arnaiy baryp tekserýdiń arqasynda kóptegen jetkizýshiler qyzmetin durys uiymdastyryp, naýqastardyń ótinishterine, olardyń shaǵymdaryna burynǵydan áldeqaida muqiiat qarai bastady», - deidi Meditsinalyq kómektiń sapasyn monitoringileý departamentiniń direktory.
