Qazaqstandyqtardyń kúnkóris deńgeiiniń mólsheri týraly máseleni almatylyq kommýnister kóterdi, dep habarlaidy QazAqparat.
Qoǵamdyq talqylaý barysynda táýelsiz sarapshy, «3ES-Injiniring» JShS quryltaishysy Qadyrseiit Aihanov Qazaqstandaǵy eń tómengi kúnkóris deńgeiin qaita qaraý máselesi boiynsha óz pikirin bildirdi.
Onyń aitýynsha, eń tómengi jalaqy kúnkóris deńgeiiniń negizinde qalyptasady jáne ol eń tómengi kúnkóris deńgeiinen tómen bolmaýy kerek.
«Kúnkóris deńgeii degenimiz - adamnyń qalypty jumysyn qamtamasyz etý jáne densaýlyǵyn saqtaý úshin jetkilikti shyǵyndardyń bolýy. Ol qalai eseptelýi kerek? Men muny zerttei bastadym. Eń tómengi kúnkóris deńgeiiniń negizinde eń tómengi jalaqy qalyptasady, ol kúnkóris deńgeiinen tómen bola almaidy. Bul tek soǵysta, qurǵaqshylyqta nemese daǵdarysta minimaldy bolýy múmkin. Endi biz memleketimiz qandai jaǵdaida ekenin anyqtap alýymyz qajet. Máselen, búginde eń tómengi kúnkóris deńgeii - 34 myń teńge, ol bekitilgen. Endi osyny bóleiik. Azyq-túlikke 17 myń teńge jáne 17 myńy basqa taýarlarǵa, onyń ishinde mádeni jáne áleýmettik qajettilikter de kiredi. Iaǵni, 17 myńǵa teatrǵa baryp, manikiýr jasatyp, kommýnaldyq tólemderdi tólei alasyz ba? Shyndyqqa janaspaidy. Mysaly, tańǵy, túski jáne keshki asty 300 teńgeden alyńyz. Bir adamǵa, bylaisha aitqanda, kúnine kem degende 1000 teńge qajet. Eger bul somany 30 kúnge kóbeitsek, 30 myń teńge. Al, bizge bul shyǵyndarǵa 17 myń ǵana bólindi», - dedi spiker.
Kommýnisterdiń pikirinshe, qazaqstandyqtardyń kúnkóris deńgeiin dúkenge nemese bazarǵa barmaityn adamdar sanaǵan. Sondyqtan eń tómengi kúnkóris deńgeiiniń mólsherin qazirgi zamanǵy qajettilikterdi eskere otyryp qaita qaraý kerek.
«2020 jyldyń maýsym aiynda jan basyna shaqqandaǵy eń tómengi kúnkóris deńgeii 34 myń teńgege jetti, bul ótken jyldyń maýsymymen salystyrǵanda 13,7% artyq. Alaida, bárimiz kórip otyrǵandai, bul soma halyqtyń qajettilikterin óteýge jetkiliksiz. Sondyqtan eń tómengi kúnkóris deńgeiiniń mólsheri kem degende eki ese ósýi kerek. Qys kele jatyr. Sonymen qatar, adamdar koronavirýstyń ekinshi tolqynyna daiyndalyp jatyr. Al bizdiń aramyzda jumyssyz, baspanasyz júrgender kóp. Olardyń jaǵdaiyna beijai qaraýǵa bolmaidy. Bizde partiiada qoǵamdyq qabyldaý bar. Kún saiyn ondaǵan adam keledi. Olardyń basym bóligi - kópbalaly analar men ákeler», – deidi partiia múshesi Gúldana Nurpeiisova.
