Qazaqstan kommýnistik halyq partiiasy Ortalyq komitetiniń hatshysy, QR Parlamentindegi atalmysh partiia fraktsiiasynyń jetekshisi Aiqyn Qońyrov eldegi jastar saiasatyn qaita qaraýǵa shaqyrdy, dep habarlaidy QazAqparat.
Bul usynysty ol depýtattyq saýal retinde Úkimet basshysyna joldady.
«Bizdiń qoǵamnyń aldynda turǵan eń ótkir máselelerdiń biri - jastardyń bolashaǵy. Álemdegi epidemiologiialyq ahýal jańa realidi qalyptastyrýda, sondyqtan jastar saiasatyna degen kózqarastardy jedel qalpyna keltirý kerek. «Halyqtyq kommýnister» fraktsiiasy jastardyń barlyq toby daǵdarysqa ushyraǵanyn atap ótedi. Jas jumysshylar eń kóp zardap shekti, óitkeni olardyń kópshiligi saýda, qyzmet kórsetý jáne beiresmi sektorlarda jumys istep kelgen edi. Qalalaryna, oblys ortalyqtaryna, aýyldarǵa oralýǵa májbúr bolǵan stýdentter az da bolsyn jumysynan aiyryldy», - dedi depýtattyq saýalynda Aiqyn Qońyrov.
Ol keltirgen málimetterge sáikes, NEET sanatyndaǵy, iaǵni jumys istemeitin jáne oqymaityn jastardyń úlesi 7,6% -ǵa deiin ósken, bul kórsetkish óse beredi. Keibir aimaqtarda jaǵdai áldeqaida kúrdeli. Máselen Qaraǵandy oblysynda bul kórsetkish 12%-dan, Almaty oblysynda - 9,6%, Shyǵys Qazaqstan oblysynda - 8,6%-dan asady.
«Úkimettiń málimeti boiynsha biyl joǵary oqý oryndaryn bitirgen túlekterdiń aimaqtardyń kópshiliginde jumyspen qamtý deńgeii 50% -dan sál asqan. Paradoks mynada: densaýlyq saqtaý salasyndaǵy kadrlardyń jetispeýshiligine qaramastan, jumyspen qamtylýdyń eń tómengi deńgeii «meditsina» baǵyty boiynsha 48%-dy ǵana quraidy. Kolledj túlekteri arasynda jumysqa ornalasý 60%-dan sál asady. Al «meditsina jáne farmatsevtika» baǵyty boiynsha - tek 51%. Ózin-ózi jumyspen qamtyǵan 478 myń adamnyń 133 myńy joǵary nemese tolyq emes joǵary bilimdi, taǵy 209 myńy orta kásiptik bilimge ie. Pandemiiaǵa bailanysty joǵary oqý oryndarynyń 700 myńǵa jýyq stýdenti men kolledjderdiń 500 myń stýdenti qashyqtyqtan oqýǵa aýystyryldy. Bul bilim sapasynyń aitarlyqtai tómendeýine alyp keledi. Bilim salasyndaǵy alshaqtyq artyp keledi. Bilim berý mekemeleriniń tek bir bóligi ǵana jańa jaǵdaida bilim sapasyn arttyrýǵa múmkindik beretin tásilderdi qoldanyp otyr», - dedi ol.
Osy máselege bailanysty kommýnister jastardyń tabysyn arttyryp, olardy jumyspen qamtý máselesin qaita qaraýǵa shaqyrdy.
«Jastardyń óz kúshimen turǵyn úi keshenderiniń qurylysyn jandandyratyn áleýmettik jobalardy qolǵa alý kerek. Eń bastysy, jastar saiasatyn qaita qaraý týraly sharalar joǵarydan kelmeýi tiis. Jastardyń ózderi belsendi bolýy kerek. Sol sebepti tiisti usynystar men jobalardyń jalpyulttyq jinaǵyn iske qosý kerek. Bul jańa urpaqqa óz bolashaǵyn modeldeýdiń shyǵarmashylyq protsesine qatysýǵa jáne jastardyń naqty qajettilikterine negizdelgen tiimdi jastar saiasatyn jasaýǵa múmkindik beredi», - dedi ol.
