Kókshetaý qalasynda zeinetker alaiaqtardyń qurbany bolyp, 3,1 million teńgeden astam qarajatyn joǵaltty, dep habarlaidy ult.kz.
Polisia.kz málimetinshe, politsiiaǵa jergilikti turǵyn óz banktik shotynan iri kólemde aqsha zańsyz sheshilgeni týraly aryz túsirgen. Atalǵan derek boiynsha qylmystyq is qozǵalyp, sotqa deiingi tergeý bastaldy.
Aldyn ala málimetke sáikes, zeinetker birneshe ai boiy zeinetaqysyn ala almaǵan. Sebebi onyń qolynda batyrmaly telefon bolǵandyqtan, mobildi banktik qosymshany paidalana almaǵan. Osyǵan bailanysty ol qyzmet kórsetý ortalyǵyna baryp, qosymshany ornatýǵa kómek suraǵan.
Tergeý barysynda kúdikti zeinetkerdiń senimine kirip, onyń mobildi banktik qosymshasyna qol jetkizgeni anyqtaldy. Keiin ol shottaǵy qarajatty úshinshi tulǵalardyń esepshottaryna aýdaryp, sondai-aq jábirlenýshiniń atyna nesie rásimdegen degen kúdikke ilindi.
Zeinetker bul jaǵdaidy bank bólimshesine júgingen kezde ǵana bilgen. Bank qyzmetkerleri onyń shotynda qarajat joq ekenin aityp, politsiiaǵa habarlasýǵa keńes bergen.
Qazir tergeý amaldary jalǵasyp jatyr. Politsiia azamattardy jeke derekterdi, bank kartalary men SMS-kodtardy bógde adamdarǵa bermeýge shaqyrdy.
