Venesýela shekarasyna jaqyn mańda bortynda Kolýmbiia prezidenti Ivan Dýke Markes bolǵan tikushaqqa belgisiz bireýler úlken kalibrli pýlemetten oq jaýdyrǵan. Bul týraly VVS habarlady.
"Prezident Ivan Dýke ushatyn tikushaq Sardinata mýnitsipalitetinen, Soltústik Santander departamentinen shyqqan kezde shabýyldandy. Tikushaqqa kem degende alty oq atyldy, ushqyshtar men ekipajdyń tájiribesiniń arqasynda jaǵdai sheshildi", - dep habarlandy Noticias Caracol telearnasynda.
Prezidentpen birge Qorǵanys jáne Ishki ister ministrleri, sondai-aq provintsiia gýbernatory bolǵan.
Prezident ókili atys saldarynan eshkim zardap shekpegenin aitty.
Ivan Dýke shabýyldy «qorqaqtardyń isi» dep atady jáne zorlyq-zombylyq pen terrorlyq shabýyldardan qorqytpaitynyn málimdedi.
«Bizdiń myqty memleket osyndai qaýip-qaterlerge qarsy tura alady», - dedi prezident Twitter-de jariialaǵan videoúndeýinde. Ol qaýipsizdik kúshterine kinálilerdi tabýǵa buiryq berilgenin de aitty.
Prezident, ministrler men gýbernator bara jatqan Kolýmbiia-Venesýela shekarasyna jaqyn jerdegi Katatýmbo aimaǵynda «Ulttyq azattyq armiiasy» solshyl radikaldy toby ornalasqan. Ol 1964 jyly qurylǵan, maqsaty - jerdi paidalaný men bailyqty bólýdegi teńsizdikke qarsy kúres.
«Ulttyq azattyq armiiasy» eldiń eń iri búlikshi toby jáne Kolýmbiia, AQSh jáne Eýropalyq odaqta terroristik uiym sanalady.
