Almaty oblysyndaǵy «Kólsai kólderi» ulttyq tabiǵi parkiniń aýmaǵynda ornalasqan Kólsai men Qaiyńdy kólderi qys bastalysymen qatyp, konki tebýge arnalǵan muz aidynyna ainalady.
Memleket qorǵaýyna alyǵan nysandar da konki tebýge bolady ma? Bul suraqqa QR Ekologiia, geologiia jáne tabiǵi resýrstar ministrligi jaýap berdi, dep habarlaidy QazAqparat tilshisi. Áleýmettik jelilerde týrister men kásibi konki tebýshilerdiń kólderde syrǵanap júrgen videolary men sýretterin tabýǵa bolady. QR Ekologiia, geologiia jáne tabiǵi resýrstar ministrliginiń baspasóz qyzmeti Kólsai kólinde konki tebýge arnalǵan arnaiy jabdyqtalǵan alańdar joq ekenin atap ótti.
«Jeke tulǵalardyń muz ústinde bolýyna (onyń ishinde konki tebýge) zańmen tyiym salynbaǵan. Kelýshiler tarapynan konki tebýge degen suranystyń artýyna bailanysty jaqyn arada ulttyq park Kólsaidyń tómengi jaǵyndaǵy kólde konki tebýge arnalǵan oryn ashýdy qarastyryp jatyr. Al Qaiyńdy kólinde qaýipsizdikti qamtamasyz etý úshin muzǵa shyǵýǵa jáne syrǵanaýǵa qatań tyiym salynady. Tómengi jáne orta kólderde balyq aýlaýǵa ruqsat etiledi», - dedi Ekologiia ministrliginiń baspasóz hatshysy Samal Ibraeva.
Kólsai men Qaiyńdy kólderi Almaty oblysy Raiymbek aýdanynyń aýmaǵynda, Almatydan ońtústik-shyǵysqa qarai 330 shaqyrym jerde ornalasqan. Aita keteiik, Úlken Almaty kólinde de konki tebýge qatań tyiym salynǵan.
