Foto: Aif.ru
Qazaqstanda agressivti júrgizý jáne jol qozǵalysy erejelerin óreskel buzý derekterine qatysty jaýapkershilik kúsheitilýde. Prokýratýra málimetinshe, jyldamdyqty shamadan tys arttyrý, qaýipti manevr jasaý siiaqty áreketter azamattardyń ómiri men densaýlyǵyna naqty qaýip tóndiredi, dep habarlaidy Ult.kz.
Mundai quqyq buzýshylyqtardyń aldyn alý úshin tek aiyppul salý jetkiliksiz bolǵan jaǵdaida, júieli ári qasaqana ereje buzatyn júrgizýshilerge qatań sharalar qoldanylady. Atap aitqanda, olardyń áreketteri Ákimshilik quqyq buzýshylyq týraly kodekstiń 434-baby («usaq buzaqylyq») boiynsha qosymsha saralanyp, 15 táýlikke deiin ákimshilik qamaqqa alý jazasy qarastyrylady.
Qazirdiń ózinde osy bap boiynsha birneshe júrgizýshi jaýapkershilikke tartylǵan. Olardyń barlyǵy buǵan deiin birneshe ret aiyppul tólegenimen, bul sharalar tiisti nátije bermegen.
Prokýratýra ókilderi bul bir rettik jyldamdyq asyrý jaǵdailary emes ekenin atap ótti. Áńgime jol erejelerin ádeii ári kórsetip buzatyn, ózgelerdiń qaýipsizdigine nemquraily qaraityn jáne keide mundai áreketterin áleýmettik jelilerde jariialaityn júrgizýshiler týraly bolyp otyr.
Mundai áreketter qoǵamdyq tártipti buzyp, jol qozǵalysynyń basqa qatysýshylaryna qaýip tóndiredi. Sondyqtan olar usaq buzaqylyq retinde baǵalanyp, sot arqyly jaýapkershilikke tartylady.
Astana qalasynyń prokýrory Ǵabit Muqanovtyń aitýynsha, qasaqana quqyq buzýshylardy oqshaýlaý agressivti júrgizýge tózbeýshilikti qalyptastyrýǵa jáne jol-kólik oqiǵalarynyń sanyn azaitýǵa baǵyttalǵan.
Elorda prokýratýrasy júrgizýshilerdi jol qozǵalysy erejelerin qatań saqtaýǵa jáne joldaǵy qaýipsizdik ortaq jaýapkershilik ekenin umytpaýǵa shaqyrdy.
