QR Parlamenti Senatynda Palata Tóraǵasynyń orynbasary Asqar Shákirovtiń tóraǵalyq etýimen Halyqaralyq qatynastar, qorǵanys jáne qaýipsizdik komitetiniń keńeitilgen otyrysy boldy. «Ulttyq qaýipsizdik týraly» Zańnyń kólik qaýipsizdigin qamtamasyz etý bóliginiń iske asyrý barysyn talqylaý kún tártibindegi negizgi másele boldy, dep habarlaidy "Ult aqparat" Senattyń baspasóz qyzmetine silteme jasap.
Tóraǵa orynbasary óz sózinde Memleket basshysy serpindi infraqurylymdyq jobalar, qyzmet kórsetý deńgeii men tranzit baǵyttardaǵy jyldamdyqty arttyrý esebinen Qazaqstannyń básekege qabilettiligin arttyrý maqsatyn alǵa qoiǵanyn eske saldy. Atap aitqanda, 24 myń shaqyrym joldy, iaǵni barlyq respýblikalyq joldar men ondaǵy qyzmet kórsetýlerdi 2025 jylǵa deiin qaita qurý jáne qamtamasyz etý mindeti qoiyldy.
Senatorlar osyǵan deiin Úkimet atyna joldaǵan depýtattyq saýalynda elimizdiń tranzittik áleýetin damytý máselesin aitqan bolatyn.
«Kólik qaýipsizdigin qamtamasyz etý deńgeiiniń jetkiliksizdigi, osy saladaǵy memlekettik saiasatqa halyqtyń rizashylyq deńgeiiniń tómendigi saladaǵy mańyzdy problemalardyń biri bolyp tabylady. Kóliktegi qaýipsizdik deńgeiin arttyrýdy memlekettik saiasattaǵy basym mindetterdiń biri retinde qarastyrý qajet», - dedi Asqar Shákirov.
Otyrys barysynda Bas prokýratýranyń, Ulttyq qaýipsizdik komitetiniń, indýstriia jáne infraqurylymdyq damý, syrtqy ister jáne qorǵanys ministrlikteriniń, basqa da mekemeler men qoǵamdyq uiymdardyń ókilderi qatysty.
Senatorlar kólik qaýipsizdigi salasyndaǵy quqyqtyq, uiymdastyrý jáne tehnikalyq problemalar, sondai-aq belgilengen máselelerdi sheshý jónindegi qabyldanyp jatqan sharalar týraly habardar etildi. Atap aitqanda, salalyq zańnamany iske asyrý barysy, áýe kemelerin paidalanýshylardyń sertifikattaý talaptaryna túzetýler boiynsha bastama jasaý, kólik salasyna investitsiia tartý jónindegi halyqaralyq yntymaqtastyqty keńeitý týraly aityldy.
