Sýret: Orda.kz
Ministrliktiń málimetinshe, elimizdiń aýmaǵynda 60 myńǵa jýyq samosval tirkelgen. Onyń ishinde, statistika málimetterine sáikes, Qytaida óndirilgen 40 myńǵa jýyq samosval shamadan tys júktememen jalpy paidalanymdaǵy joldarda júrip, inertti materialdardy tasymaldaidy.
Osylaisha, atalǵan júk kólikteriniń salmaǵy ruqsat etilgen normadan eki ese asyp túsedi. Máselen, ruqsat etilgen júkteme 25 tonna bolsa, samosvaldar jalpy salmaǵy 35-40 tonna júkti tasymaldaidy.
«Bul jol tóseminiń merziminen buryn tozýyna ákeletin ári keri áser etetin faktorlardyń biri. Jol qozǵalysyna karerlerde júretin aýyr júk kólikterimen qatar avtomobil jolyna úlken salmaq túsiretin ózge de avtokólik quraldary qatysady. Olardyń qatarynda beton aralastyrǵyshtar, avtokrandar jáne basqa da aýyr avtomobilder bar», - delingen habarlamada.
Esterińizge sala keteiik, 2022 jyldyń jeltoqsanynda avtomattandyrylǵan ólsheý stantsiialaryn ornatý jáne olardyń jumys isteý tártibin anyqtaityn Zań qabyldanǵan bolatyn. Atalǵan zańnama júk kótergishtigi 12 tonnadan asatyn avtomobilderdi ólsheý stantsiialary arqyly ótýge mindetteidi ári Zań talaptaryn buzý ákimshilik jazaǵa alyp keledi. Osy rette kóliktik baqylaýdy barynsha qamtamasyz etý úshin avtomattandyrylǵan ólsheý stantsiialarynyń sanyn edáýir arttyrý josparda bar.
Osylaisha, biyl elordaǵa kireberis jerde avtomattandyrylǵan 6 jańa stantsiia ornatyldy. Qazirgi ýaqytta olar pilottyq rejimde jumys istep tur. Kóliktik baqylaý organdary qyzmetkerleriniń aitýynsha, atalǵan sharalardy qolǵa alý arqyly aýyr salmaqty avtomobil kólik quraldarynyń qozǵalysyn baqylaýǵa qatysty máselelerdi sheshý jáne sybailas jemqorlyq táýekelderin azaitý kózdelip otyr.
