QR Indýstriia jáne infraqurylymdyq damý ministrligi Kólik komiteti tóraǵasynyń orynbasary Áli Altai «Semey Bus» JShS sýbsidiia tólenbeýi týraly máselege pikir bildirdi, dep habarlaidy QazAqparat.
«Semey Bus» JShS kvazimemlekettik kásiporyn bolyp sanalady, oǵan 2019 jyldan beri sýbsidiia tólenbegen. Semeidegi avtobýs tasymaly jaǵdaiyna nazar aýdarýyńyzdy suraimyn. Ákimdik sýbsidiia tólemeidi, kásiporyndy bankrotqa ushyratýy múmkin», - dep moderator kórermen suraǵyn oqydy.
Kólik komiteti tóraǵasynyń orynbasary Áli Altai bul máseleden habardar ekenin jetkizdi.
«Eki jyl boiy olar Ónerkásipti damytý qory arqyly avtobýstar satyp aldy. Qazir olar bir de bir teńgeni ótemedi. Ónerkásipti damytý qory óz tarapynan protsedýralyq túrde sotqa júginýge jáne buryn jasasqan sharttardy toqtata turýǵa mindetti. Ákimdik tarapynan osy jylǵa sýbsidiialar qarastyrylǵan, biraq kásipkerdiń ákimdikke engizgen ótinimderi óte úlken boldy. Ákimdikpen esh ýaǵdalastyq joq. Máseleni baqylaýda ustap otyrmyz», - dedi Áli Altai «Kazinform» alańynda «Qoǵamdyq kólikpen jolaýshylar tasymaldaýdaǵy básekelestik» atty jiynda.
Buǵan deiin Shyǵys Qazaqstan oblysynda jolaýshy tasymaldaityn kompaniia - «Semey Bus» JShS-ǵa jospardan tys tekseris júrgizilip, 72 zańbuzýshylyq anyqtalǵany habarlanǵan edi. «Semey Bus» JShS-niń jumysshylar aldyndaǵy jalpy qaryzy 6 274 139 teńgeni quraidy.
