Qazaqstanda kólik baqylaý inspektsiialary qyzmetkerleriniń shtat sany kóbeitilmeidi. Bul jaiynda Májilis depýttarynyń resmi saýalyna QR Premer-Ministriniń orynbasary Jeńis Qasymbektiń jaýabynda aitylǵan, dep habarlaidy QazAqparat tilshisi.
«Avtomobil kóligi týraly» qoldanystaǵy Zańnyń oryndalýyn qatań qadaǵalap, avtojoldardy aýyr salmaqty kólikterdiń búldirýine jol bermeýge tiisti óńirlik kólik baqylaý inspektsiialary ózderine júktelgen mindetti tolyq atqaryp otyr deý qiyn ekendigi aitylǵan. Sebebi olardyń qyzmetkerleriniń sany az jáne materialdyq-tehnikalyq jabdyqtalýy jetkiliksiz. Mysal úshin, eginshilikpen ainalysatyn Soltústik Qazaqstan oblysynyń kólik baqylaý inspektsiiasyndaǵy 6 qyzmetker 13 aýyldyq aýdannyń joldaryndaǵy kólik aǵynyn qadaǵalap úlgere alar emes. Munda jalǵyz-aq jyljymaly kóliktik baqylaý beketi bar. Al ulan-ǵaiyr egin alqabyna ie Qostanai oblysynda nebári 2 jyljymaly beket jumys isteidi. Astyqty Aqmola oblysynda da olardyń sany - 4-eý ǵana», - delingen depýtattardyń resmi saýalynda.
Sonymen qatar Májilis depýtattary elimizdiń negizgi astyqty óńirleriniń erekshelikterin eskere otyryp, olardyń kólik baqylaý inspektsiialary qyzmetkerleriniń jáne jyljymaly kólik baqylaý beketteriniń sanyn kóbeitý máselesin qarastyrýdy usynǵan bolatyn.
Resmi saýalǵa jaýap bergen Jeńis Qasymbektiń atap ótýinshe, Qazaqstan Respýblikasynyń avtomobil kóligi týraly zańnamasynyń saqtalýyn memlekettik baqylaýdy 48 jyljymaly, 3 statsionarlyq kóliktik baqylaý beketi jáne arnaiy avtomattandyrylǵan ólsheý quraly (budan ári - AAÓQ) júzege asyrady.
«Búgingi kúngi Qazaqstan Respýblikasynda kólik quraldary men onyń salmaq gabaritti ólshemderi týraly aqparatty avtomattyq túrde jiberetin 12 AAÓQ bar. Tek 2018 jyly AAÓQ kólik zańnamasynyń 804 buzýshylyǵyn anyqtaǵan, aýyr salmaqty jáne (nemese) iri gabaritti kólik quraldarymen júrip ótken úshin 91 mln 937 myń teńgeden astam aiyppul men alym somasy óndirildi, Jyljymaly kóliktik baqylaý beketterinde (budan ári - JKBB) 24 242 buzýshylyq anyqtalyp, 5 mlrd. 951 mln teńgeden astam aiyppul men alym somasy óndirildi. Budan basqa, 2018 jyly kólik salasyndaǵy ýákiletti organ 8 JKBB, Pavlodar oblysynyń ákimdigi 3 JKBB satyp aldy jáne kóliktik baqylaý inspektsiiasynyń teńgerimine berildi», - dep atap ótedi vitse-premer.
Sonymen birge ol kóliktik baqylaý salasyndaǵy sybailas jemqorlyqtyń oryn alǵandyǵyn eskere otyryp, QR Indýstriia jáne infraqurylymdyq damý ministrligi jáne QR Memlekettik qyzmet isteri jáne sybailas jemqorlyqqa qarsy is-qimyl agenttigi arasynda kóliktik baqylaý salasyndaǵy sybailas jemqorlyq táýekelderin joiý jóninde birlesken is-sharalar jospary qabyldanǵanyn eske salady.
«Qoldanystaǵy jospardyń sheńberinde avtokólik quraldaryn salmaq gabaritti ólsheýdiń avtomattandyrylǵan stantsiialaryn qurý arqyly kóliktik baqylaýdy qashyqtyqtan júzege asyrý nysanyna tolyq kóshirý sharalary pysyqtalýda, bul baqylaý-qadaǵalaý fýnktsiialaryn júzege asyrý kezinde laýazymdy adamdardyń qatysýyn boldyrmaidy. Osyǵan bailanysty, aldaǵy ýaqytta JKBB-niń jáne laýazymdy adamdardyń sanyn kóbeitý kózdelmegen», - dedi Jeńis Qasymbek.
