Nur-Sultan qalasynyń ákimi Altai Kólginov elordada koronavirýs infektsiiasynyń taralýyna jol bermeý úshin qandai sharalar qabyldanǵanyn aityp berdi, dep habarlaidy "Ult aqparat".
«Biz 22 naýryzdan beri halyqaralyq reisterden 2500 jolaýshyny karantinge jatqyzdyq. Onyń ishinde bes adamnan koronavirýs anyqtaldy. Iaǵni bes adamdy qalaǵa jibermedik. Olardy emdep jatyrmyz. Álemdik tájiribe kórsetip otyrǵandai koronavirýsty juqtyrǵan bir adam qaraýsyz qalsa 10 kúnnen keiin aýyrǵandardyń sany 3500-ge jetip jyǵylady. Keshe memlekettik komissiia 1 sáýirden bastap barlyq halyqaralyq reisti toqtatý týraly sheshim qabyldady. Iaǵni Nur-Sultan halyqaralyq reisterdi qabyldamaidy», - dedi qala ákimi Tengriniýs.kz portalyna bergen tikelei eifrdegi suhatynda.
Shahar basshysynyń aitýynsha, qazirgi ýaqytta elordada 175 adamnan koronavirýs infektsiiasy anyqtalǵan. Olardyń bári statsionarda jatyr.
«Sonymen birge karantinde jatýy tiis azamattarǵa arnap 8 jataqhana daiyndadyq. Olardyń virýs juqtyrmaǵany anyqtalǵannan keiin ǵana biz olardy úi karantinine jiberemiz. Dál qazir osyndai qatań sharalardy qabyldaýymyz kerek. Onsyz nátijege qol jetkize almaimyz», - dedi ol.
Altai Kólginov sonymen qatar qalalyqtarǵa úndeýin joldady.
«Qansha qyrýar qarajat ketip, áleýmettik baǵdarlamalar qabyldanyp jatyr. Bir-birimizdi synap, ne beresiń demei, men qalai kómektese alamyn deýimiz kerek. Mundai jappai karantin elde buryn bolmaǵan. Sony durys seziný kerek. Eger bir-birimizdi qoldap, tártip saqtasaq, karantindi erte bitiremiz. Erterek jumysqa turýymyz kerek. Úlken jastaǵy adamdarymyzdy kútýimiz kerek. Qazir bir-birimizdi synaityn ýaqyt emes, qoldaityn ýaqyt. Jumyla kótergen júk jeńil», - dedi Altai Kólginov.
