Jyl sońyna deiin 191 aýdannyń jaiylym jospary bekitiledi, dep habarlaidy "Ult aqparat".
Bul týraly Premer-Ministrdiń orynbasary Roman Skliar Májilis ókilderiniń depýtattyq saýalyna bergen jaýabynda aitty.
«Shynynda da aýyl turǵyndarynyń mal basy úshin jaiylym problemasy bar. Eldimekenderdiń jaiylym alqaptary bar bolǵany 21 mln gektardy quraidy. Halyqtyń qolyndaǵy malǵa 50 mln gektardan astam jaiylym qajet. Iaǵni, tapshylyq 30 mln gektardai. Oblystyq, qalalyq, aýdandyq, aýyldyq okrýgter, kentter, aýyldyq ákimdikterine aǵymdaǵy jyldyń aiaǵyna deiin uiymdasqan sharýashylyqtarda júktelmegen jaiylymdardy qaita bólýge baǵyttalǵan Jaiylymdardy basqarý men paidalanýdyń eki jyldyq josparyn ázirlep bekitý júkteldi», - deidi Roman Skliar.
Vitse-Premer negizi jaiylym máselesi zań júzinde rettelgenin aityp otyr. Alaida jergilikti atqarýshy organdar zań talaptaryn iske asyrý kezinde kemshilikter jibergen.
«Jospar ázirleý tek aýdan deńgeiinde júrgizilip, aýyldyq okrýgterdiń jaiylymǵa muqtajdyǵy jáne mal jaiý shemasy eskerilmegen. Osyǵan bailanysty, oblystarda 2021-2022 jyldarǵa arnalǵan josparlardy bekitý jumystary júrgizilýde. 144 aýdan boiynsha josparlar bekitildi. Al 47 aýdannyń jospary kelisý jáne bekitý satysynda. Jyl sońyna deiin bul jumystar tolyq aiaqtalatyn bolady», - dep jazylǵan depýtattyq saýalǵa berilgen jaýapta.
