Viktor Hrapýnovtyń orynbasary zańsyz satylym barysyn áshkere qyldy. Ol jer telimderi men jyljymaityn múliktiń Hrapýnov pen onyń týystarynyń menshigine qalai ótkenin ótkenin sotta aityp berdi, dep habarlaidy QazAqparat tilshisi.
Sottalýshy Iakov Zaiats 1998-2004 jyldary Almatynyń eks-ákimi Viktor Hrapýnovtyń orynbasary bolyp qyzmet atqarǵan. Ol sáýlet salasynda, jol jóndeý, jolairyqtar salýda jetekshilik etken. Sondai-aq jer qatynastary jáne qala qurylysy máseleleri jónindegi komissiia múshesi bolǵan.
Emen baǵyn jeke menshik iesine satý týraly hattamaǵa qol qoiǵan ol jaýap alý kezinde istegen isin moiyndap, ókinish bildirdi.
«Másele bul aýmaqta jyljymaityn múliktiń jalǵa berilýinde. Jyljymaityn múlik satylyp ketkende, jer qatynastary komissiiasynyń mindeti - jer telimi iesin ózgertý edi. Buryn bul jer qalalyq atqarýshy komissiianyń demalatyn orny bolatyn. Hrapýnov mundai sheshim qabyldaǵan kezde meni shaqyryp, bylai dedi: «Partiialyq obektilerdiń bárin burynǵydai jekeshelendirý kerek. Kásipodaqtaǵylar Shymbulaq pen Medeýdi jekeshelendirdi». Men túbegeili qarsy boldym. Ol meni komissiia quramyna kúshtep qosty. Meniń aldyma qol qoiylǵan qujatty tastady. Onda komissiianyń qoly da qoiylǵan bolatyn. Onyń qysymymen jer teliminiń maqsatty baǵyty ózgergeni týraly jer qatynastary komissiiasynyń sheshimine qol qoiýǵa májbúr boldym», - dedi Iakov Zaiats.
Sottalýshy taǵylǵan aiyptyń bárimen kelisetinin aitty.
«Bul kórsetkishterdi moiyndaimyn. Munyń bári Hrapýnovtyń qysymymen bolǵan. Meniń syrtymnan qoiylǵan qolǵa kelisim berýge májbúr boldym. Ol meniń qujattarǵa qol qoiýymdy suraǵan kezde hattamada menen basqasynyń báriniń qoly boldy. Kelisim kezinde jer qatynastary jáne qala qurylysy komissiiasy ókilderi, qalanyń bas sáýletshisi, jer resýrstary jónindegi qalalyq komitet departamenti, tabiǵatty qorǵaý mekemeleriniń ókilderi jáne zańgerler boldy», - dedi aiyptalýshy.
Zańbuzýshylyq ekenin bile tura, qujatqa nege qol qoiǵanyn suraǵan prokýrorǵa ol oqiǵanyń qysym men qorqytý arqyly júzege asqanyn aitty.
«Ol meni qyspaqqa alyp, qorqytty. Ol kezde ota jasatqaly júrgenmin. Men kelisimimdi berdim. Jáne ol úshin aiyptymyn. «Men seni ornyńnan alyp tastaimyn, kózińdi qurtamyn» dedi. Bárinen buryn qol qoisań da, qoimasań da, endigi mańyzy qalmaǵan edi. Kóp qujattardy mensiz de rásimdep jibergen. Jer telimderi men jyljymaityn múlikti satý, aýdarý tek sonyń quzyrynda boldy», - dedi ol.
Iakov Zaiats budan bólek «Goriachie istochniki»,UOS ardagerleri emhanasyn, Syrtqy ister ministrligi qabyldaý úiin jáne Gornyi kóshesi, 232 mekenjaiyndaǵy jer telimine qatysty qujattarǵa qol qoiǵany úshin aiyptalǵan.
Eske sala ketsek, erli-zaiypty Hrapýnovtar uiymdasqan toppen birge memleket menshigin urlaý, laýazymdyq ókilettikti asyra paidalaný, alaiaqtyq, para alý, qylmystyq jolmen alynǵan múlikti zańdastyrý baptary boiynsha aiyptalyp otyr.
