Nur-Sultan qalalyq qoǵamdyq densaýlyqty saqtaý basqarmasynyń basshysy Sáýle Qisyqova koronavirýstyń aldyn alýǵa baǵyttalǵan birqatar keńes berdi, dep habarlaidy QazAqparat.
«Jeke gigiena sharalar saqtaýǵa barynsha nazar aýdarý qajet. Olar: qoldy jýý, antiseptikter paidalanyp, jótelgen kezde saqtyq sharalaryn saqtaý, bólmege dymqyl tazalyq júrgizip, aýany tazartý. Biz kezdesý barysynda qol berip amandaspaýǵa, jiti respiratorlyq virýstyq infektsiia belgileri bar tulǵalarmen tyǵyz bailanysta bolmaýǵa keńes beremiz», - dedi ol.
Basqarma basshysy buqaralyq sharalarǵa barýdan da bas tartý virýs juqtyrý qaýpin tómendetetindigin basa aitty.
«Munyń barlyǵy da jalpy keńester sanalady. Barlyq erejelerdi saqtaýyńyz sizdiń jáne tóńiregińizdegilerdiń densaýlyǵyn saqtaýǵa múmkindik beredi dep senemiz», - dedi Sáýle Qisyqova.
Buǵan deiin Nur-Sultan qalalyq qoǵamdyq densaýlyqty saqtaý basqarmasynyń basshysy qalada koronavirýstyń taralýyna jol bermeý baǵytynda qolǵa alynǵan sharalardy aitqan edi.
