Pavlodarlyq prokýrorlar qoqystan tabylǵan Eltańba men prokýratýra taqtaishasyna qatysty qyzmettik tekseristi aiaqtady, - dep habarlaidy Tengrinews.kz.
Quzyrly vedomstvo ókilderi qoqysta jatqan memlekettik simvolikaǵa mekemeniń qatysy joǵyn aitty.
"Pavlodar oblystyq prokýratýrasy qoqystan tabylǵan Aqtoǵai aýylynyń prokýratýrasyna tiesili taqtaisha men eski nusqadaǵy Eltańbaǵa qatysty qyzmettik tekseris júrgizdi. Tekseris barysynda Eltańba aýdandyq prokýratýraǵa tiesili emes ekeni anyqtaldy. Aqtoǵai aýdandyq prokýratýrasynyń qyzmetkerleri Eltańba tabylǵan qoqysqa qatysy joq", - dedi Pavlodar oblysy prokýrorynyń mindetin atqarýshy Jarqyn Qusaiynov.
Vedomstvo málimetinshe, bul derekti politseiler tergep jatyr.
"Aqtoǵai aýylyndaǵy qoqys poligonyna memlekettik rámizdi laqtyrǵan adamdar anyqtalyp jatyr. Bul derek boiynsha Aqtoǵai aýdandyq politsiia bólimshesi QR Qylmystyq kodeksiniń 372-baby boiynsha sotaldy tergeý júrgizip jatyr", - dedi Qusaiynov.
Eske salaiyq, 15 sáýirde Pavlodar oblysyndaǵy aýyldardyń birindegi qoqys úiindisinen Eltańba men prokýratýra taqtaishasy tabylǵany habarlanǵan bolatyn. Instagram jelisinde jariialanǵan videoda Aqtoǵai aýdanynyń prokýratýrasynyń taqtaishasy jatqany kórsetilgen. Onyń janynda eki Eltańba bolǵan, onyń biri synyp qalǵan, al ekinshisi bútin.
Video paida bolǵannan keiin tabylǵan zatty Pavlodar oblysynyń prokýratýrasy zerttei bastaǵan. Vedomstvo ókilderi bul derek tekserilip jatqanyn habarlaǵan edi.
