«Qazsýshar» RMK 2021 jylǵy sý tasqyny kezeńine daiyndyq boiynsha josparly jumys júrgizýde.
Osy baǵytta naqty qandai sharalar qabyldanyp jatqany týraly QR Ekologiia, geologiia jáne tabiǵi resýrstar ministrliginiń Facebook-tegi paraqshasyndaǵy tikelei efirde «Qazsýshar» RMK Bas direktorynyń orynbasary Erlan Sádýaqasov málimdedi.
Onyń aitýynsha, sý tasqyny qaýpiniń aldyn alý úshin kásiporyn ótken jyldyń kúzinen bastap sý qoimalarynda bos syiymdylyqtar qurý boiynsha jumys júrgizýde.
«Biz bul baǵytta 2020 jyldyń kúzinen bastap jumys istep kelemiz. Sondai-aq, basseindik inspektsiialarmen, Tótenshe jaǵdailar salasy ókilderimen jáne ákimdiktermen birlesip, gidrotehnikalyq qurlystardy kózben sholyp, tekserý júrgizdik. Tótenshe jaǵdai týyndai qalsa, qurylys jáne basqa da inertti materialdardyń, qaptardyń qajetti qorlary daiyndaldy, tiisti arnaiy tehnika bar, janar-jaǵarmai daiyn», - dep atap ótti spiker.
Erlan Sádýaqasov habarlaǵandai, «Qazsýshar» RMK balansynda respýblikalyq menshiktegi 4953 sý sharaýashylyǵy jáne gidromeliorativtik obektiler bar, onyń ishinde: 86 sý qoimasy, 84 sý toraby, 36 bóget, 103 sorǵy stantsiiasy, 46 bas qurylys, 3298 kanal jáne basqa da sý sharýashylyǵy obektileri bar.
«Barlyq sý qoimalary bekitilgen kestege sáikes jumys isteidi jáne kóktemgi tasqyn sýdy jiberetin syiymdylyq qory bar. Olardy jobalyq kólemge deiin toltyrǵan jáne sý mol kólemde keletin bolsa, olar tranzittik rejimde jumys isteidi», - dep habarlady Qazsýshar basshysynyń orynbasary.
Erlan Sádýaqasov Qazaqstanda sý tasqyny kezeńi ońtústik óńirlerdi qospaǵanda, naýryz aiynyń basynda bastalatynyn, al erigen sý aqpannyń basynda keletinin atap ótti. Sý tasqyny maýsymynyń sátti ótýi aýa-raiy jaǵdailaryna jáne sý tasqynyna qarsy ýaqytyly qabyldanǵan sharalarǵa tikelei bailanysty.
«Aqpan aiynda «Qazgidromet» ylǵal qorynyń kólemi men topyraqtyń qatý tereńdigi týraly aqparatty usynady. Bul kóktemgi sý tasqyny qaýpi bar aimaqtardy anyqtaidy. Sondai-aq, olardyń málimetteri negizinde biz sý qoimalarynyń jumys rejimin túzetemiz. Bul qaýipti gidrologiialyq qubylystardy der kezinde anyqtaý, gidrotehnikalyq qurylystardyń jaǵdaiyn baqylaý úshin jasalady», - dep túiindedi ol.
