Aqmola oblysynyń óńirlik kommýnikatsiialar qyzmetinde tarihi-ádebi ólketanýdy damytý sheńberinde «Jer shoqtyǵy – Kókshetaý» taqyrybynda baspasóz konferentsiiasy ótti. Sharaǵa Aqmola oblystyq mádeniet, arhivter men qujattamalar basqarmasy basshysynyń orynbasary Gúlmira Beknazarova, Qazaqstan Jazýshylar odaǵynyń múshesi, aqyn, RhD doktory Erbolat Baiat, jazýshy, satirik Ermahan Shaiqy, jazýshy Qanaǵat Ábilqaiyr qatysyp, jýrnalisterdiń suraqtaryna jaýap berdi.
Kókshe jeri ejelden tunyp turǵan syr, sóilep turǵan sýret. Óskeleń urpaqtyń týǵan jerdiń tarihy men mádenietin oqyp, zerdeleýine, jalpy, qyzyǵýshylyqtary men tanymdyq qabiletterin arttyrý maqsatynda qolǵa alynǵan joba aiasynda aldaǵy ýaqytta aýqymdy josparlar júzege asatyn bolady. Bul jaiynda oblystyq mádeniet, arhivter men qujattamalar basqarmasy basshysynyń orynbasary Gúlmira Samatqyzy tarqatyp aityp berdi.
– «Rýhani jańǵyrý» baǵdarlamasy aiasynda júzege asyrylyp jatqan tarihi-ádebi ólketaný jobasynyń basty maqsaty – óńirimizdiń tarihyn kórkem ádebiet arqyly nasihattaý bolyp tabylady. Bolashaqta bul eńbekter shetel tiline aýdarylady. Bul – aldaǵy ýaqytta óńirimizge týristerdi tartýǵa zor septigin tigizedi dep oilaimyz. Atalmysh joba 2018 jyly bastaý alǵan. Joba aiasynda filologiia ǵylymdarynyń doktory, jazýshy Nurdáýlet Aqysh «Afanasii Latýta» atty tarihi roman jazsa, aqyn, jýrnalist Jumash Kenebai «Ǵashyq júrek» taqyrybynda poema, jazýshy Aigúl Kemelbaeva «Arqanyń altyn beldeýi» atty ǵylymi ocherk jazyp, shyǵarmalardyń elektrondyq nusqasyn Aqmola oblystyq jáne óner mýzeiiniń qoryna tabys etti. Aldaǵy ýaqytta jobany iske asyrý barysynda jazylǵan osy jáne basqa da kitaptardy Úkimettiń qoldaýymen bir seriia qylyp shyǵarý josparlanýda.
Aǵymdaǵy jyly jobany júzege asyrý úshin bizdiń óńirge Almatydan arnaiy eki jazýshy keldi. Sonymen qatar, Aqmola oblysynan aqyn, jazýshy Erbolat Baiat ta osy igi iske at salyspaqshy. Osy oraida, atalmysh joba aiasynda eseli eńbek etip, aýqymdy jumysty júzege asyryp jatqan jazýshylarǵa zor alǵys bildiremiz, – dedi Gúlmira Samatqyzy.
Ataqty Birjan sal «Jer shoqtyǵy – Kókshetaý» dep ánge qosqan, aqyn Sáken Seifýllin «Seksen kól Kókshetaýdyń saiasynda» dep jyrlaǵan sulý Kóksheniń kieli jerleri týraly aqparattardy jinaqtaý úshin jazýshylardan jasaqtalǵan ǵylymi-zertteý ekspeditsiiasy óńirimizdiń aýdandary men aýyldaryn aralap, arhiv qujattarymen tanysyp, eldegi kónekóz, káriqulaq qariialarmen tildesip, tyń derekter jinaqtaýda.
Jiyn barysynda Qazaqstan Jazýshylar odaǵynyń múshesi, aqyn, RhD doktory Erbolat Baiat, jazýshy, satirik Ermahan Shaiqy, jazýshy Qanaǵat Ábilqaiyr óz oilaryn ortaǵa saldy.
