Sýret: 716.kz
Kókshetaý qalasynyń 32 jastaǵy turǵyny 10 táýlikke qamaýǵa alyndy. Ol mas kúiinde kópbeiindi oblystyq balalar aýrýhanasynyń bólimsheleriniń birine kirip, qyzmetkerlermen urysyp, tóbelesken, - dep habarlaidy Tengrinews.kz 716.kz saityna silteme jasap.
Basylym málimetinshe, bul dárigerlerge jasalǵan alǵashqy shabýyl emes. Meditsinalyq mekeme direktory Serikjan Sabyraliev naýqas tarapynan kórsetilgen árekettiń taǵy bir deregin bólisti.
Mekeme basshysy naýryzdyń basynda aýrýhanada balalar úiinen jiberilgen 10 jastaǵy bala josparly emdelgenin aitty. Ol aýrýhanaǵa túsken kúni buryn ata-ana quqyǵynan aiyrylǵan balanyń anasy da paida bolǵan.
"Áiel adam balany alyp ketkisi keldi, onyń aýrýhanaǵa jatqyzylatynyna kelispedi. Biraq dáriger anasyna emdeý josparyn aityp, aýrýhanaǵa kelý tártibin túsindirdi", - dedi dáriger.
Alaida áiel birneshe kúnnen keiin aýrýhanaǵa mas kúiinde kelgen. Kelýshilerge arnalǵan tártipti buzyp, bólimge kirgen. Videodan áiel meditsinalyq mekemede tóbeles shyǵaryp, ádepsiz sóilep, dárigerlerge kúsh qoldanǵany kórsetilgen. Munyń bári balalar bóliminde, balalardyń kózinshe bolǵan.
Oqiǵa ornyna shaqyrtý boiynsha kelgen politseiler áieldi tynyshtandyrǵan.
2021 jyly áiel sot sheshimimen ata-ana mindetterin tiisinshe oryndamaǵany jáne ishimdik ishkeni úshin ata-ana quqyǵynan shektelgen. Bala sot sheshimimen qorǵanshylyq organdaryna, al keiin balalar úiine berilgen.
Áiel buzaqylyq úshin qaita sottalyp otyr (buryn ol sol bap boiynsha jaýapqa tartylǵan).
Kókshetaý qalasynyń ákimshilik quqyqbuzýshylyqtar jónindegi mamandandyrylǵan sotynyń 2022 jylǵy 16 naýryzdaǵy qaýlysy boiynsha Kókshetaý qalasynyń 32 jastaǵy turǵyny 10 táýlikke ákimshilik qamaýǵa alyndy.
