Aqmola oblysynda birinshi halyqaralyq «TeArt-Kókshe» festivali óz máresine jetti.
Festivaldi «Rýhani jańǵyrý» baǵdarlamasy men «Uly dalanyń jeti qyry» maqalasyndaǵy mindetterdi júzege asyrý sheńberinde Aqmola oblysy ákimdigi men Nur-Sultan qalasyndaǵy Resei ǵylym jáne mádeni ortalyǵy birge uiymdastyrǵan.
30 qazan - 3 qarasha aralyǵynda ótken festivalge Qazaqstan, Resei jáne Ýkraina elderinen kelgen 13 teatr ujymy qatysyp, oblys ortalyǵyndaǵy sahnalarda óz ónerin ortaǵa saldy. Shara teatrlar arasynda ónerdi nasihattaýǵa, áriptestikti, mádeni jáne shyǵarmashylyq bailanysty nyǵaitýǵa baǵyttalǵan.
Jiynda sóz sóilegen Aqmola oblystyq orys drama teatrynyń direktory Beibit Bahtygereev Aqmola oblysy men Kókshetaý qalasynyń mádeni ómirindegi aýqymdy sharanyń mańyzyna toqtaldy.
«Qazaqstandaǵy orys teatrlarynyń óńiraralyq festivalin ótkizýde tájiribemiz bar. Osyndai aýqymdy sharany ótkizýge qol ushyn sozǵan Aqmola oblysy ákimdigi men Resei ǵylym jáne mádeni ortalyǵyna alǵysymyzdy bildiremiz», dedi Beibit Bahtygereev.
Festivalge T.Júrgenov atyndaǵy Qazaq ulttyq akademiiasynyń tarih jáne teatr teoriiasy óneri kafedrasynyń meńgerýshisi Sániia Qabdieva jetekshiligimen Qazaqstan, Resei, Germaniia, Grýziia elderinen kelgen teatr maitalmandary qazylyq etti. Olardyń arasynda Erkin Jýasbek, Armine Oganesian, Niiaz Aglamov, Nina Mazýr, Laha Chhartishvili bar. Sharanyń jabylý saltanatynda aimaq basshysy Ermek Marjyqpaevtyń atynan Aqmola oblysy ákiminiń orynbasary Aina Mysyrálimova quttyqtaý sóz sóilep, qatysýshylar men qazylardy oblys ákiminiń Alǵys hatymen marapattady.
Festival qorytyndysy boiynsha Shyǵys Qazaqstan oblysynyń Semei qalasyndaǵy F.M. Dostoevskii atyndaǵy memlekettik orys drama teatrynyń ujymy gran-pri iegeri atansa, «Groza» dramasyn usynǵan Riazan memlekettik oblystyq teatrynyń ujymy «Úzdik akterlik ansambl» atalymy boiynsha, «Chichikov» spektaklinde Pliýshkin pomeshiktiń rólin somdaǵan Aqmola oblystyq orys drama teatrynyń akteri Timýr Valiev «Úzdik akter» atalymy boiynsha, «Pisma liýbvi» spektaklinde Melissa Gardnerdiń rólin somdaǵan A.N. Ostrovskii atyndaǵy Kisheshemskii drama teatrynyń aktrisasy Elina Manapova «Úzdik aktrisa» atalymy boiynsha marapattaldy. Festivalge qatysýshylardyń barlyǵy estelik syilyqtarmen marapattaldy.
