Búgingi tańda Arys qalasyndaǵy Ontam jáne Syrdariia eldi mekenderin gazben qamtamasyz etýge oblystyq biýdjetten 88,9 mln. teńge qaralyp, jobalyq-smetalyq qujattamalary daiyndaldy. Gazdandyrý úsh kezeń boiynsha júrgiziledi. Birinshi kezeń úshin oblystyq qazynadan 2018 jylǵa 884 mln., 2019 jylǵa 500 mln. jáne 2020 jylǵa 1 mlrd. 581 mln. teńge bólinip otyr. Josparǵa sáikes qaladaǵy «Samal», «Stadion» jáne «Ońtústik» shaǵynaýdandaryndaǵy 6709 úi gazǵa qosylsa, sonymen birge, 15 shaqyrymǵa joǵary qysymdy gaz qubyrlary tartylmaq.
Qurylys jumystarynyń ekinshi kezeńinde respýblikalyq biýdjetten biylǵa 719,8 mln., kelesi jylǵa 219,7 mln. teńge qarastyryldy. Osynaý qomaqty qarjyǵa Arystyń «Otyrar», «Pochtovyi», «ShPZ», «Led-Zavod», «Hlopkom», «Naýryz» shaǵynaýdandaryn jáne Syrdariia aýylyndaǵy 1993 turǵyn úidi gazben qamtamasyz etý kózdelýde.
Úshinshi kezeńde respýblikalyq qazynadan 2018–2019 jyldarǵa 567 mln. teńge bólinip, shahardaǵy «Alataý», «Saiajai», «Kóktem-1», «Kóktem-2», «Taraz» shaǵynaýdandaryndaǵy jáne Ontam eldi mekenindegi 1147 úige gaz tartylady.
Jalpy, 2018–2025 jyldar aralyǵynda Arys qalasyna qarasty 26 eldi mekendi gazdandyrý josparlanýda. Bul jospar oryndalsa, arystyqtardyń 99,5 paiyzy «kógildir otynǵa» qol jetkizedi.
Al, aýyzsý máselesine kelsek, búgingi tańda Arys qalasy jáne 32 eldi mekenniń 19-y ortalyqtandyrylǵan qubyr sýymen qamtamasyz etilgen. Adam sany boiynsha eseptegende, Arys turǵyndarynyń 92,6 paiyzy taza aýyzsý iship otyr. Qala men eldi mekenderge sý berýshi – «Qazsýshar» RMK oblystyq filialynyń Arys toptastyrylǵan sý júiesi óndiristik bólimshesi jáne «Temirjolsý-Arys» pen «Aqaba-Servis» mekemeleri. Qalanyń «Taldyqudyq» jáne «Otyrar» shaǵynaýdandaryna aýyzsý júrgizý úshin magistraldy sý ótkizgish toraptary qurylysynyń jobasy qolǵa alyndy. Ótken jyly osy maqsatqa orai 78,3 mln. teńge bólinip, qaralǵan qarjy tolyǵymen igerildi. Atalmysh jobanyń qurylys-montajdaý jumystary biyl da jalǵasyn taýyp, jyl sońyna deiin aiaqtaý josparlanyp otyr.
