Qoǵamdyq keńesterdiń usynysyn memlekettik organdar mindetti túrde qaraýy kerek. OKQ-da ótken baspasóz máslihatynda Aqparat jáne qoǵamdyq damý vitse-ministri Bolat Tilepov osylai dedi, dep habarlaidy QazAqparat.
«Bul jerde shynaiy ári naqty tetikter týraly sóz qozǵalyp otyr. Keńes berýshi organ retinde qoǵamdyq keńester usynys ázirleýi kerek. Ol usynystar jańa túzetýlerge sáikes, qandai da bir memlekettik organdarda mindetti túrde qaralýy kerek», - dedi Bolat Tilepov tilshilerdiń suraǵyna jaýap bere otyryp.
Onyń aitýynsha, usynystar qabyldanbaýy da múmkin. Biraq odan ne úshin bas tartatynyn túsindirip, memlekettik organdar negizdeme berýi tiis.
«Qandai da bir máseleler burynnan aitylmai, qaralmai kele jatýy múmkin. Sol sebepti memlekettik organdar belgili bir másele boiynsha sheshim qabyldaityn kezde qoǵamdyq keńester naqty usynysyn bere alady. Qoǵamdyq keńes quramy tiisti jumys toptarynan quralady. Memlekettik organdardyń yqpalyn azaitý úshin jumys tobynyń ózin de sailaý arqyly aiqyndaý tetigi engizilgen. Oǵan qoǵam ókilderi enýi tiis», - dedi Bolat Tilepov.
