Astanadaǵy «Qazmedia ortalyǵy» ǵimaratynda Táýelsizdiktiń 25 jyldyǵyna orai, Qazaqstan halqy Assambleiasynyń qoldaýymen, «Qazaqstandyq biregeilik, etnosaralyq kelisim jáne qoǵamdaǵy til mádenietiniń deńgeiin arttyrý» taqyrybynda «Máńgilik El» jalpyulttyq patriottyq ideiasyn ilgeriletýge baǵyttalǵan dáris ótti. Oǵan Parlament depýtattary, QHA músheleri, qoǵam qairatkerleri, saiasatkerler, ǵylymi jáne shyǵarmashylyq ziialylar, etnomádeni jáne jastar birlestikteriniń ókilderi, eriktiler qatysty.
Sharany uiymdastyrýshylardyń aitýynsha, dáristiń maqsaty – qoǵamdyq kelisim modeli men jalpyulttyq birliktiń biregei tájiribesin nasihattaý. Osy oraida, jiynǵa qatysýshylar qazaqstandyq patriotizm arqyly etnosaralyq qatynastar men Qazaqstan halqynyń birligin odan ári nyǵaityp, tájiribe almasýǵa baǵyttalǵan ózekti máselelerdi talqy tarazysyna saldy.
Dáristiń ashylýynda sóz alǵan «Qazaqstan halqy Assambleiasynyń Qory» QQ direktory Qurmanbek Qazanbasov: «Táýelsiz eldiń, jalpy táýelsiz adamnyń arman-maqsaty bolady. Ony oryndaý úshin árbir ýaqytyn josparlaidy. Bizdiń elimizdiń saiasi turǵyda bolsyn, ekonomika jaǵynan bolsyn 25 jylda qol jetkizgen jetistikteri az emes. Qazir Táýelsiz Qazaqstannyń simvolyna ainalǵan, árqashan da maqtanatyn Astanamyz bar», dedi. Sondai-aq, bul dáristiń taqyryby teginnen-tegin tańdalyp alynbaǵanyn aitty. «Jalpy, «Máńgilik El», onyń ishinde «máńgi» degen sózdiń túp-tórkinine tereń úńiler bolsaq, ol – jer, ol – Qazaqstan memleketiniń ataýy, ol – kók Týymyz, tilimiz, dilimiz, dástúrimiz. Al olardy qurmettep, máńgi saqtaityn bolsaq, jerimizdiń, elimizdiń damýyna úles qossaq, Qazaqstan eliniń de máńgi bolatynyna sóz joq», dedi Qurmanbek Jumaǵaliuly.
Al «Astana halyqaralyq qarjy ortalyǵy ákimshiliginiń» AQ basqarýshy direktory Saiasat Nurbek: «Biz 3 jyl buryn úlken zertteý jumystaryn júrgizdik. Men ol kezde «Nur Otan» partiiasy janyndaǵy qoǵamdyq «Saiasat» institýtynyń direktory bolǵan edim. Sol kezde biz Qazaqstan qoǵamynyń qundylyqtaryn jete zerttep, zerdelei bastadyq», dei kele, osydan 10-15 jyl buryn elderdiń damýy, ekonomikalyq órkendeýi, modernizatsiia qabilettiligi dástúrli uǵymdarmen túsindiriletinin, biraq, keiin tereńdetilgen zertteýlerdiń arqasynda bul uǵymdardyń aýysqanyn, olardyń ornyna basqa túsinikter paida bolǵanyn, qazirgi tańda institýtsionaldy ekonomikada úlken tóńkeris, úlken ózgeris bolyp jatqanyn jetkizdi. Sonymen qatar, ol kez kelgen memleket ekonomikasynyń damýyna tek resmi institýttar emes, qundylyqtar da tikelei áser etetinin aitty.
Bul kúni is-sharaǵa qatysqan azamattar sonymen qatar, «Ulttar arasyndaǵy kelisim – Táýelsiz Qazaqstannyń eń basty jetistigi», «Jyraýlyq – patriottyqqa tárbieleý quraly», «Qazaqstandyq qoǵamdyq kelisim modeli – Qazaqstan halqy Assambleiasy aiasynda azamattyq pen patriotizmdi qalyptastyrý» degen taqyryptar boiynsha sóz sóiledi.
Láila EDILQYZY,
«Egemen Qazaqstan»
.jpeg)