Foto: YouTube
Búgin kórnekti memleket jáne qoǵam qairatkeri Jumabek Táshenovtiń týǵanyna 110 jyl toldy, dep habarlaidy Ult.kz.
Jumabek Ahmetuly 1915 jyly Aqmola oblysy Arshaly aýdany Babatai aýylynda týǵan. Aqmola qurylys tehnikýmyn, KOKP OK janyndaǵy joǵary partiia mektebin bitirgen. Ekonomika ǵylymynyń kandidaty.
1934-1939 jyldary Beinetqor aýdany atqarý komitetiniń hatshysy, aýdan jer bóliminiń meńgerýshisi, 1939-1943 jyldary Aqmola oblysy jer bólimi bastyǵynyń orynbasary, 1944-1947 jyldary Soltústik Qazaqstan oblysy partiia komiteti hatshysynyń orynbasary, mal sharýashylyǵy bóliminiń meńgerýshisi, 1947-1948 jyldary Soltústik Qazaqstan oblysy atqarý komiteti tóraǵasynyń orynbasary, tóraǵasy (1948-1952), 1952-955 jyldary Aqtóbe oblysy partiia komitetiniń 1-hatshysy, 1955-1960 jyldary Qazaq KSR-i Joǵarǵy Keńesi tóralqasynyń tóraǵasy, 1960-1961 jyldary Qazaq KSR-i Ministrler Keńesiniń tóraǵasy qyzmetterin atqardy.
Táshenov respýblikanyń saiasi, ekonomikalyq, mádeni damýyna basshylyq jasaǵan jyldary qazaq memleketiniń aýmaq tutastyǵynyń saqtalýyna kóp eńbek sińirdi.
Mańǵystaýdy Túrikmenstanǵa qosý jónindegi usynystarǵa toitarys berdi. Tyń ólkesine biriktirilgen soltústik oblystardy Reseige, Ońtústik Qazaqstannyń maqta egetin aýdandaryn Ózbekstanǵa berýge qarsy shyqty. Qazaqstan jerinde iadrolyq jarylystar jasaýǵa qarsylyq bildirdi. Shyǵarmashylyq odaqtar ókilderine úi-páter bergendigi úshin Almatynyń ortasynda "qazaq aýylyn" qurdy dep aiyptaldy. "Qazaq ádebieti" gazetin jabýdan aman alyp qaldy.
"Sotsialistik Qazaqstan" gazetin "Kazpravdanyń" aýdarmasy etip shyǵarylý qaýpinen qorǵap qaldy. Bul jaiynda "Egemen Qazaqstan" gazetiniń 100 jyldyǵyna orai elordada ótken halyqaralyq ǵylymi-praktikalyq konferentsiiada ǵalym, professor, Qazaqstannyń memlekettik syilyǵynyń iegeri Serik Qirabaev bylai dep eske alǵan edi: "Biz gazettiń eń bir qiyn kezeńderinde – aitys pen tartystyń, urys pen diktatýranyń kúshti kezinde qyzmetke bardyq. Men komsomoldyń bir jýrnalynyń redaktory edim. Qaraqulov degen Ortalyq partiia komitetiniń bólim basshysy shaqyryp aldy da, "Siz "Sotsialistik Qazaqstanǵa" (qazirgi "Egemen Qazaqstan") qyzmetke barasyz. Redkollegiianyń múshesi bolyp, ádebiet jáne óner bóliminiń bastyǵy bolasyz" dedi. Sol barǵan jerde birshama aitys-tartys bolyp ketti. Diktatýranyń myqty kezi. Ol kezde Ortalyq partiia komiteti kishkene asyǵystaý jasady – gazetti aýdarma jasaý kerek degen áńgime shyqty. Sol bastamany "gazet eldiki" dep bógep tastaǵan Jumabek Táshenov edi. Sol Táshenovterdiń arqasynda gazetti aýdarma jasamai, alyp qaldyq. Sondai bir qiyn kezeńdi basymyzdan ótkerdik".
Qoǵam qairatkeri "ultshyl" dep aiyptalyp, N.Hrýshevtiń nusqaýymen qyzmetinen bosatyldy. 1961-1975 jyldary Shymkent (qazirgi Ońtústik Qazaqstan) oblysy atqarý komiteti tóraǵasynyń orynbasary boldy. 1975 jyly odaqtyq dárejedegi derbes zeinetkerlikke shyqty. Ómiriniń sońǵy kezeńinde "Qarakól" ǵylymi-zerthanalyq institýtynda, Ońtústik Qazaqstan oblysy taldaý-esepteý ortalyǵynda qyzmet atqardy.
Ol 1986 jyly 18 qarashada Shymkent qalasynda dúnieden ótti. Qala kósheleriniń birine onyń esimi berildi, músini ornatyldy. Astanada J.Táshenov kóshesi bar. Onyń qairatkerligi týraly "Ult maqtanyshy" derekti filmi túsirilgen.
