Shymkenttegi daǵdarys ortalyǵyna bala kezinde seks quldyqqa satylǵan 30 jastaǵy áiel tústi, dep habarlady Sputnik Qazaqstan agenttigi Otyrar.kz portalyna silteme jasap..
Ózbekstan týmasynyń aitýynsha, ata-anasy jalǵyz qyzyn on jasynda beitanys adamdarǵa satyp jibergen.
Qyzdyń ákesi nashaqor, anasy maskúnem bolǵan. Otbasynda balanyń taǵdyryna atasy ǵana alańdapty – alaida ol nemeresin satyp jatqanyn estip, júrek talmasynan qaitys bolǵan.
Qyzdy shekaradaǵy Saryaǵash qalasyna, odan keiin Shymkentke ákelip, úlken jeke úige qamap tastaǵan. Kishkentai tutqyn ómiriniń jeti jylyn jezóksheler úiinde ótkizdi. Odan bólek taǵy 20 qyz seksýaldyq quldyqta bolǵan. Baiǵus balalarǵa tek nan men sý bergen.
Boijetken kútpegen jerden bostandyqqa shyqty: jezóksheler úiin uiymdastyrýshylardyń biri 17 jastaǵy qyzǵa aiaýshylyq tanytqan.
"Ol jerde ashtyqtan kóptegen qyz óldi. Keibirin shetelge satyp jiberdi. Bir-birimizben sóilespeitin edik. Klientpen jatýdan bas tartsaq, temir shynjyrmen uryp, basymyzǵa qarý kezenetin. Bul qorqynyshty jerden ketýge olardyń adamdarynyń biri kómektesti. Ol meni aiady", - deidi áiel.
Ol qashyp shyqqannan keiin de taǵdyr tálkegine ushyrady: jyldar óte kele júkti boldy, biraq ulyn bosanýyna úsh ai qalǵanda balanyń ákesi qashyp ketken. Áielge eriktiler kómektesti. Búginde 30 jastaǵy kelinshek bir jasar ulymen Shymkenttegi daǵdarys ortalyǵynda turyp jatyr.
"Kómek" daǵdarys ortalyǵynyń direktory Malika Júsipovanyń aitýynsha, eriktiler áielge úmit syilaǵysy keledi.
"Onyń armany bar dep oilaimyn. Qyz balalyq shaǵyn quldyqta, zorlyq-zombylyqta ótkizgendikten, ómirde kóp nárseden aiyrylǵan", - deidi Júsipova.
Burynǵy tutqyn jazyp, oqi almaidy. Áieldiń qolynda qujaty da, aqshasy da joq. Biraq bul báribir quldyqtan, zorlyq pen qorlaýdan jaqsy, deidi ol.
Shymkenttegi daǵdarys ortalyǵynda odan bólek seksýaldyq zorlyq-zombylyqtyń qurbany bolǵan taǵy bes qyz turyp jatyr.
