Áleýmettik jelide Smanov Abdýlaxad Ábdisattarulynyń «Jánnattaǵy hor qyzdary» týraly ýaǵyzy pikir-talas týdyrǵan bolatyn. Osyǵan bailanysty Qazaqstan musylmandary dini basqarmasy resmi málimdeme jariialady, dep habarlaidy Baq.kz aqparat agenttigi.
Múftiiattyń málimdemesinde bylai delingen:
- Birinshiden, Abdýlaxad Əbdisattaruly Qazaqstan musylmandary dini basqarmasynyń qyzmetkeri de, meshit imamy da emes. Atalǵan tulǵanyń QMDB joldamasymen shetelde oqyp júr degen aqparat orynsyz. Oǵan eshqandai joldama berilgen emes.
- Ekinshiden, aitylǵan ýaǵyz Qazaqstan musylmandary dini basqarmasynyń ustanymy men kózqarasyn bildirmeidi.
- Úshinshiden, jánnatta ár erkekke 4900 áiel beriledi degen sózdiń negizi joq. Bul jóninde sahih hadister kelmegen.
Imam Býharidyń sahih jinaǵyndaǵy Ábý Hýrairadan (r.a.) jetken hadiste «árbir jánnat iesine eki hor qyzy beriledi» delingen (Ibn Hajar ál-Asqalani. Fáthý ál-Bári sharhý sahihi ál-Býhari. «Jaratylystyń bastalýy» kitaby, «Jánnattyń sipaty jáne onyń jaratylǵandyǵy týraly» baby, №3245. – Beirýt: ál-Maktabátý ál-asriia, 2007. – T.5. – 3833 b.). Alaida, bul hadiste birneshe áiel alsa jánnat iesine tiesili qor qyzdarynyń sany artady degen maǵyna shyqpaidy. Ony Abdýlahad Əbdisattarulynyń ózi burmalaǵan.
Qazaqstan musylmandary dini basqarmasy musylman jamaǵatyn kez kelgen, ásirese túrli əleýmettik jelilerdegi qisynsyz, beiresmi dini maǵlumattarǵa den qoimaýǵa, qandai da bir dini saýal týyndasa, múmkindiginshe meshit imamdarynan kelip jón suraýǵa, ǵalamtordaǵy dini málimetti QMDB-ǵa qarasty saittar men áleýmettik jelilerden ǵana alýǵa shaqyrady.
QMDB jeke tulǵalardyń əleýmettik jelilerdegi paraqshasynda jariialaǵan aýdio jəne beinejazbalaryna baqylaý jasaýyna QMDB-nyń quqyqtyq ókilettigi joq ekenin málimdeidi.
Sondai-aq, dini basqarma qoǵamdaǵy dini máseleler boiynsha pátýa shyǵaratyn resmi mekeme tek Qazaqstan musylmandary dini basqarmasynyń Ǵulamalar Keńesi men Shariǵat jáne pátýa bólimi ekenin taǵy bir ret eskertedi.
Esterińizde bolsa, buǵan deiin Ábdiǵappar Smanovtyń kredit jaily ýaǵyzy da áleýmettik jeli qoldanýshylarynyń pikir-talasyn týdyrǵan bolatyn. Oǵan da múftiiattiń resmi ókili jaýap qatqan edi.
