Qazaqstan musylmandary dini basqarmasy tótenshe jaǵdai kezinde suraqtarǵa jaýap berý úshin call-center ashty. Bul týraly Bas múfti Naýryzbai qajy Taǵanuly málim etti, dep habarlaidy QazAqparat.
«Qazir biz elimizdegi tótenshe jaǵdai kezinde halyqqa úmit shýaǵyn shashyp, olardy jigerlendirip, imanyn kúsheitip, qulshylyǵyn arttyrý maqsatynda onlain nasihat aityp, internet jelisi arqyly arnaiy dáristerdiń kestesin bekittik. Sonymen qatar, jamaǵattyń suraǵyna der kezinde jaýap berý úshin call-center ashtyq. Onyń nómiri – 33-30-30. Ortalyqqa Nur-Sultan qalasynyń kody arqyly telefon shalýǵa bolady. Ortalyqta din salasynyń bilikti mamandary táýlik boiy qazaq jáne orys tilindegi suraqtarǵa jaýap beredi», - dedi Bas múfti Ortalyq kommýnikatsiialar qyzmetindegi brifingide.
Osy rette ol naýqas jandarǵa meditsinalyq kómek kórsetip júrgen dárigerlerge, qaýipsizdik sharalarynyń alǵy jebindegi ishki ister jáne qorǵanys salasynyń qyzmetkerlerine, halyqqa obektivti aqparat taratyp otyrǵan BAQ ókilderine, qaiyrymdylyq sharasyna belsendi túrde atsalyp júrgen barsha erikti azamattarǵa alǵysyn aitty.
«Halqymyzda «Qaiyrymdylyq jasasań – qaiyryn óziń kóresiń» degen naqyl sóz bar. Dini basqarmanyń negizgi jumys baǵyttarynyń biri – qaiyrymdylyq. Men jurtymyzǵa joldaǵan Úndeýimde karantin kezinde úmitsizdikke boi aldyrmai, saýapty amaldar men qaiyrymdylyq sharalarǵa úles qosýǵa shaqyrdym. Osy Úndeýden keiin din qyzmetkerleri karantin kezinde 17 643 otbasyna kómek kórsetti. Sonymen qatar juqpaly indettiń aldyn alý maqsatynda halyqqa karantin kezinde 47 821 dana betperde tarattyq. Betperde meshitterimizdegi tigin sheberhanalarynda tigildi. Qalǵan bóligi demeýshilerdiń kómegimen jetkizildi», - dedi Bas múfti.
Osy oraida ol igi bastamaǵa úles qosqan barsha din qyzmetkerlerine, demeýshi azamattarǵa rizashylyn bildirdi.
«Biz qashan da ózgelerge qaiyrymdylyq jasap, jan-jaǵymyzǵa shýaǵymyzdy tógip, sharapatymyzdy tigizip, adamnyń alǵysyn alyp ósip-óngen elmiz», - dedi Naýryzbai qajy Taǵanuly.
Budan buryn habarlanǵandai, Naýryzbai qajy Taǵanuly biyl elimizde Ramazan aiy 24 sáýir kúni bastalatynyn aitty.
