AQSh-tyń 42-prezidenti Bill Klinton ákimshiligi tusynda memlekettik hatshy bolǵan Madlen Olbrait 85 jasynda dúnieden ozdy. Bul jóninde 23 naýryzda marqumnyń otbasy habarlady, dep jazady Azattyq.
Madlen Olbrait 1937 jyly 15 mamyrda Pragada Chehoslovakiianyń Belgradtaǵy elshiliginde qyzmet istegen Iozef Korbel otbasynda dúniege kelgen. 1939 jyly Chehoslovakiia jaýlap alynǵannan keiin otbasy Londonǵa kóshken.
Soǵys aiaqtalǵannan keiin Korbel otbasymen birge Chehoslovakiiaǵa oralǵan. Alaida bilikke kommýnister kelgennen keiin AQSh-qa qonys aýdarǵan. 1957 jyly Madlen Olbrait Amerika azamattyǵyn aldy. Eki jyldan soń Ýellslidegi áielder kolledjiniń bakalavr dárejesine ie boldy.
1997 jyly Olbrait AQSh memlekettik hatshysy qyzmetine taǵaiyndalǵan alǵashqy áiel atandy.
1992 jyly ol Bill Klintonnyń keńesshisi bolǵan. Klinton prezident bolyp taǵaiyndalǵannan keiin AQSh-tyń BUU-daǵy turaqty ókili boldy.
Olbrait NATO-ny ulǵaitýdy qoldap, 1999 jyly áskeri odaqtyń Iýgoslaviiadaǵy jaǵdaiǵa aralasýyn quptady. Balqandaǵy "Odaq kúshi" áskeri operatsiiasy sonyń bir nátijesi boldy. Jarylystan birneshe myń adam qaza boldy.
Orys tilinde jazatyn internet qoldanýshylar arasynda "Sibir bailyǵynyń bir ǵana elge tiesili bolýy ádiletsizdik" degen sózdiń Olbraitqa tiesili ekeni jii aitylady. Biraq burynǵy memlekettik hatshynyń ózi 2015 jyly muny joqqa shyǵarǵan. New York Times basylymynyń jazýynsha, Olbraittyń muny aitqanyna dálel joq. Soǵan qaramastan Kreml muny jii paidalanady. 2021 jyly mamyrda Resei prezidenti Vladimir Pýtin "Olbrait aitty" deitin oidan shyǵarylǵan "qanatty sózge" súiengen.
Reseidiń Ýkrainaǵa basyp kirýine bir kún qalǵanda New York Times burynǵy memlekettik hatshynyń "Kreml kórshi memleketke basyp kirse, Máskeý tarihi qatelikke urynady" degen sózin basty.
