Elordalyq «Barys» qurlyqtyq hokkei ligasy plei-off satysynda búgin reseilik «Metallýrg» (Magnitogorsk) komandasymen alǵashqy kezdesýin ótkizdi, dep habarlaidy QazAqparat.
Kezdesý barysynda eki komanda tartysty oiyn ótkizdi. Bir-biriniń qaqpasy mańynda jii shabýyl jasady. Birinshi kezeńde esep ashylǵan joq.
Ekinshi kezeńniń alǵashqy minýttarynda qazaqstandyq klýbtyń basymdyǵy baiqalyp turdy.
Nátijesinde 22-minýtta elordalyq klýbtan Tomash Iýrcho mergendik tanytty.
Úshinshi kezeńde «Barys» hokkeishisi Iakob Lilia 40-minýtta esepti ústemelei tústi. Al 47-minýtta reseilik klýbtan Linýs Videll kózdegen nysanadan múlt ketken joq.
Tomash Iýrcho 50-minýtta taǵy bir márte mergendigimen kózge tústi. Reseilik klýbtan Nikolai Goldobin 52-minýtta esep aiyrmasyn qysqartty.
Osylaisha «Barys» qarsylasyn 3:2 esebimen tize búktirdi. Nátijesinde plei-off satysyndaǵy jeńister seriiasynda alǵashqy upaiyna qol jetkizdi.
Endi taǵy bir oiyn 3 naýryzda Magnitogorsk qalasynda ótedi. Odan keiingi eki kezdesý 5 jáne 7 naýryzda elordada bolady.
Alǵashqy tórt matchta jeńimpaz anyqtalmaǵan jaǵdaida odan keiingi oiyndar 9 naýryzda Magnitogorskide, 11 naýryzda Nur-Sultanda, 13 naýryzda Magnitogorskide ótedi.
