«Qazaq tilindegi 100 jańa oqýlyq» jobasy aiasynda oqýlyqtardaǵy teoriia aǵylshyn tilinen aýdarylǵanmen, praktikalyq máseleler Qazaqstannyń tájiribesine súienip jazyldy. Bul týraly elorda ákimdiginde ótken «Qazaq tilindegi 100 jańa oqýlyq» jobasy aiasyndaǵy Ulttyq aýdarma biýrosynyń jumysy týraly brifingte aityldy, dep habarlaidy "Ult aqparat".
«Qazirgi ýaqytta bilim berý salasyndaǵy mektepterdiń 80%-y qazaq tilinde jumys isteidi. Joǵary oqý oryndaryndaǵy stýdentterdiń 70%-y sanaly túrde qazaq tili bólimin tańdap baryp jatyr. Mamandyqty tańdap barǵan jastar qajetti oqýlyqtardy óz tilinde taba almasa, oqý sapasy joǵary bolmaidy. Osy turǵyda biyl aýdarylǵan 30 oqýlyqqa toqtalyp ótýge bolady. Mysaly, mikroekonomika, makroekonomika týraly buǵan deiin qazaq tildi oqýlyq bola qoiǵan joq. Bul oqýlyq bolǵannan keiin jekelegen teoriialardy ǵana nasihattamai, ǵylym salasyna basynan aiaǵyna deiin jolý jasaidy», - deidi «Ulttyq aýdarma biýrosy» qoǵamdyq qorynyń jetekshisi Raýan Kenjehanuly.
Onyń aitýynsha, keibir oqýlyq Qazaqstannyń tájiribesine beiimdele otyryp aýdarylǵan.
«Mysaly, «Jeke qarajat» dep atalatyn oqýlyq jalaqy, zeinetaqy, depozit, nesie siiaqty qarajatty qalai júielep, qalai josparlaýǵa bolatynyn úiretedi. Osy oqýlyqta teoriiany aǵylshyn tilinen aýdarǵanmen, praktikalyq máselelerdi Qazaqstannyń tájiribesine súienip jazdyq. Demek, bul - tikelei aýdarý ǵana emes, kitapty biz ómir súrip jatqan qoǵamǵa beiimdeý jaǵyna mán berildi», - deidi ol.
