Qazaqstanda tanymal tulǵalardyń shyǵarmashylyǵy nemese áleýmettik jelidegi kontenti arqyly esirtkini nasihattaý faktileri anyqtalsa, olar zań aiasynda jaýapkershilikke tartylady. Bul týraly Astanada ótken baspasóz konferentsiiasynda QR IIM Esirtki qylmysyna qarsy is-qimyl komitetiniń basqarma bastyǵy, politsiia polkovnigi Baqytjan Ámirhanov Ult.kz tilshisiniń saýalyna jaýap berý barysynda aitty.
Ult.kz tilshisi sońǵy jyldary tanymal adamdardyń esirtkige qatysty daýly oqiǵalary jiilep ketkendei áser qaldyratynyn aityp, ministrlik muny jastar arasynda esirtkini janama túrde nasihattaityn faktor retinde baǵalai ma degen suraq qoidy.
Baqytjan Ámirhanovtyń aitýynsha, mundai jaǵdailardyń barlyǵy birdei esirtkini nasihattaý bolyp sanalmaidy.
Foto: Ortkom
«Esirtkini nasihattaýǵa qatysty Qylmystyq kodekstiń 299-1-baby engizilgen. Osy bap boiynsha 100-den astam qylmystyq is qozǵaldy. Tanymal adamdarǵa qatysty búgingi tańda naqty aqparat kelip túsken joq. Áleýmettik jelilerde, buqaralyq aqparat quraldarynda túrli málimetter kezdesip jatady. Biraq olardyń barlyǵy birdei nasihat nemese jarnama bolyp eseptelmeidi. Eger ondai faktiler anyqtalsa, tiisti jaýapkershilikke tartamyz», – dedi ol.
Komitet ókili sóz arasynda áleýmettik jelilerde keńinen talqylanǵan qazaqstandyq reper Kislo-Sladkiige qatysty da pikir bildirdi.
«Mysaly, "Kislo-Sladkii" degen reperge qatysty suraqtar boldy. Qazirgi tańda ol Qazaqstanda emes, Tailandta júr. Sol jóninde túrli aqparattardy oqydyq. Onyń keibir shyǵarmalarynda mundai taqyryptardy mysqyldap aitatyn tustary bar. Al basqa tanymal tulǵalarǵa qatysty naqty saýaldar bizge túsken joq», – dedi Baqytjan Ámirhanov.
Sonymen qatar ol esirtki qoldanǵany belgili bolǵan tanymal adamnyń keiin áleýmettik jelilerde nemese sahnada belsendi qyzmetin jalǵastyrýy jastarǵa keri áser etetinin aitty.
«Árine, bul jastarǵa keri áser etedi. Jastar tanymal adamdarǵa elikteidi. Sondyqtan Ishki ister ministrligi janynan quqyqbuzýshylyqtyń aldyn alý jónindegi arnaiy keńes qurdyq. Onyń quramynda belgili blogerler men media tulǵalar bar. Olar jastar arasynda durys qundylyqtardy nasihattaýǵa atsalysady. Eger belgili bir tulǵa sahnadan nemese áleýmettik jelide zańǵa qaishy dúnielerdi nasihattasa, jastar soǵan elikteýi múmkin. Sondyqtan mundai adamdarǵa mindetti túrde shara qoldanamyz», – dedi komitet ókili.
Onyń aitýynsha, zań buzǵan tanymal tulǵalarǵa qatysty qabyldanǵan sharalar qoǵamǵa ashyq jariialanady.
«Ondai faktiler bolsa, birden barlyq jerde jariialaimyz. Bul ózgelerge sabaq bolýy úshin qajet», – dedi ol.
Baqytjan Ámirhanov buǵan deiin mundai jaǵdailar boiynsha jaýapkershilikke tartylǵandar bolǵanyn da atap ótti.
«Osydan eki-úsh jyl buryn "Shiza" tobynyń oryndaýyna bailanysty birden shara qoldanylǵan bolatyn. Eger quqyqbuzýshylyq anyqtalsa, ákimshilik nemese qylmystyq jaýapkershilik qoldanylady. Búginde eshkim ashyq túrde esirtkini jarnamalamaidy. Sońǵy ýaqytta mundai faktiler tirkelgen joq», – dedi ol.
Ult.kz tilshisi án mátinderinde nemese beinebaiandarda esirtkige qatysty astarly sózder qoldanylsa, onyń nasihat bolyp sanalatynyn da naqtylady.
Bul suraqqa jaýap bergen komitet ókili árbir mundai material arnaiy sot saraptamasyna jiberiletinin aitty.
«Ánniń mátini bolsyn, beinerolik bolsyn nemese kiimdegi jazý bolsyn – barlyǵy sot saraptamasyna joldanady. Eger saraptama onyń quramynda esirtkini nasihattaý belgileri bar ekenin anyqtasa, zańǵa sáikes jaýapkershilikke tartylady», – dedi politsiia polkovnigi.
Ministrliktiń deregi boiynsha 2026 jyldyń alǵashqy alty aiynda 1885 esirtki qylmysynyń joly kesilip, 6 uiymdasqan qylmystyq toptyń qyzmeti toqtatyldy. Sondai-aq 9 uiymdastyrýshy men 29 belsendi qatysýshy ustaldy jáne 15 myńnan astam zańsyz internet-resýrs buǵattaýǵa joldandy.
