قازاقستاندا تانىمال تۇلعالاردىڭ شىعارماشىلىعى نەمەسە ەلەۋمەتتٸك جەلٸدەگٸ كونتەنتٸ ارقىلى ەسٸرتكٸنٸ ناسيحاتتاۋ فاكتٸلەرٸ انىقتالسا, ولار زاڭ اياسىندا جاۋاپكەرشٸلٸككە تارتىلادى. بۇل تۋرالى استانادا ٶتكەن باسپاسٶز كونفەرەنتسيياسىندا قر ٸٸم ەسٸرتكٸ قىلمىسىنا قارسى ٸس-قيمىل كوميتەتٸنٸڭ باسقارما باستىعى, پوليتسييا پولكوۆنيگٸ باقىتجان ەمٸرحانوۆ Ult.kz تٸلشٸسٸنٸڭ ساۋالىنا جاۋاپ بەرۋ بارىسىندا ايتتى.
Ult.kz تٸلشٸسٸ سوڭعى جىلدارى تانىمال ادامداردىڭ ەسٸرتكٸگە قاتىستى داۋلى وقيعالارى جيٸلەپ كەتكەندەي ەسەر قالدىراتىنىن ايتىپ, مينيسترلٸك مۇنى جاستار اراسىندا ەسٸرتكٸنٸ جاناما تٷردە ناسيحاتتايتىن فاكتور رەتٸندە باعالاي ما دەگەن سۇراق قويدى.
باقىتجان ەمٸرحانوۆتىڭ ايتۋىنشا, مۇنداي جاعدايلاردىڭ بارلىعى بٸردەي ەسٸرتكٸنٸ ناسيحاتتاۋ بولىپ سانالمايدى.
فوتو: ورتكوم
«ەسٸرتكٸنٸ ناسيحاتتاۋعا قاتىستى قىلمىستىق كودەكستٸڭ 299-1-بابى ەنگٸزٸلگەن. وسى باپ بويىنشا 100-دەن استام قىلمىستىق ٸس قوزعالدى. تانىمال ادامدارعا قاتىستى بٷگٸنگٸ تاڭدا ناقتى اقپارات كەلٸپ تٷسكەن جوق. ەلەۋمەتتٸك جەلٸلەردە, بۇقارالىق اقپارات قۇرالدارىندا تٷرلٸ مەلٸمەتتەر كەزدەسٸپ جاتادى. بٸراق ولاردىڭ بارلىعى بٸردەي ناسيحات نەمەسە جارناما بولىپ ەسەپتەلمەيدٸ. ەگەر ونداي فاكتٸلەر انىقتالسا, تيٸستٸ جاۋاپكەرشٸلٸككە تارتامىز», – دەدٸ ول.
كوميتەت ٶكٸلٸ سٶز اراسىندا ەلەۋمەتتٸك جەلٸلەردە كەڭٸنەن تالقىلانعان قازاقستاندىق رەپەر كيسلو-سلادكييگە قاتىستى دا پٸكٸر بٸلدٸردٸ.
«مىسالى, "كيسلو-سلادكيي" دەگەن رەپەرگە قاتىستى سۇراقتار بولدى. قازٸرگٸ تاڭدا ول قازاقستاندا ەمەس, تايلاندتا جٷر. سول جٶنٸندە تٷرلٸ اقپاراتتاردى وقىدىق. ونىڭ كەيبٸر شىعارمالارىندا مۇنداي تاقىرىپتاردى مىسقىلداپ ايتاتىن تۇستارى بار. ال باسقا تانىمال تۇلعالارعا قاتىستى ناقتى ساۋالدار بٸزگە تٷسكەن جوق», – دەدٸ باقىتجان ەمٸرحانوۆ.
سونىمەن قاتار ول ەسٸرتكٸ قولدانعانى بەلگٸلٸ بولعان تانىمال ادامنىڭ كەيٸن ەلەۋمەتتٸك جەلٸلەردە نەمەسە ساحنادا بەلسەندٸ قىزمەتٸن جالعاستىرۋى جاستارعا كەرٸ ەسەر ەتەتٸنٸن ايتتى.
«ەرينە, بۇل جاستارعا كەرٸ ەسەر ەتەدٸ. جاستار تانىمال ادامدارعا ەلٸكتەيدٸ. سوندىقتان ٸشكٸ ٸستەر مينيسترلٸگٸ جانىنان قۇقىقبۇزۋشىلىقتىڭ الدىن الۋ جٶنٸندەگٸ ارنايى كەڭەس قۇردىق. ونىڭ قۇرامىندا بەلگٸلٸ بلوگەرلەر مەن مەديا تۇلعالار بار. ولار جاستار اراسىندا دۇرىس قۇندىلىقتاردى ناسيحاتتاۋعا اتسالىسادى. ەگەر بەلگٸلٸ بٸر تۇلعا ساحنادان نەمەسە ەلەۋمەتتٸك جەلٸدە زاڭعا قايشى دٷنيەلەردٸ ناسيحاتتاسا, جاستار سوعان ەلٸكتەۋٸ مٷمكٸن. سوندىقتان مۇنداي ادامدارعا مٸندەتتٸ تٷردە شارا قولدانامىز», – دەدٸ كوميتەت ٶكٸلٸ.
ونىڭ ايتۋىنشا, زاڭ بۇزعان تانىمال تۇلعالارعا قاتىستى قابىلدانعان شارالار قوعامعا اشىق جارييالانادى.
«ونداي فاكتٸلەر بولسا, بٸردەن بارلىق جەردە جارييالايمىز. بۇل ٶزگەلەرگە ساباق بولۋى ٷشٸن قاجەت», – دەدٸ ول.
باقىتجان ەمٸرحانوۆ بۇعان دەيٸن مۇنداي جاعدايلار بويىنشا جاۋاپكەرشٸلٸككە تارتىلعاندار بولعانىن دا اتاپ ٶتتٸ.
«وسىدان ەكٸ-ٷش جىل بۇرىن "Shiza" توبىنىڭ ورىنداۋىنا بايلانىستى بٸردەن شارا قولدانىلعان بولاتىن. ەگەر قۇقىقبۇزۋشىلىق انىقتالسا, ەكٸمشٸلٸك نەمەسە قىلمىستىق جاۋاپكەرشٸلٸك قولدانىلادى. بٷگٸندە ەشكٸم اشىق تٷردە ەسٸرتكٸنٸ جارنامالامايدى. سوڭعى ۋاقىتتا مۇنداي فاكتٸلەر تٸركەلگەن جوق», – دەدٸ ول.
Ult.kz تٸلشٸسٸ ەن مەتٸندەرٸندە نەمەسە بەينەبايانداردا ەسٸرتكٸگە قاتىستى استارلى سٶزدەر قولدانىلسا, ونىڭ ناسيحات بولىپ سانالاتىنىن دا ناقتىلادى.
بۇل سۇراققا جاۋاپ بەرگەن كوميتەت ٶكٸلٸ ەربٸر مۇنداي ماتەريال ارنايى سوت ساراپتاماسىنا جٸبەرٸلەتٸنٸن ايتتى.
«ەننٸڭ مەتٸنٸ بولسىن, بەينەروليك بولسىن نەمەسە كيٸمدەگٸ جازۋ بولسىن – بارلىعى سوت ساراپتاماسىنا جولدانادى. ەگەر ساراپتاما ونىڭ قۇرامىندا ەسٸرتكٸنٸ ناسيحاتتاۋ بەلگٸلەرٸ بار ەكەنٸن انىقتاسا, زاڭعا سەيكەس جاۋاپكەرشٸلٸككە تارتىلادى», – دەدٸ پوليتسييا پولكوۆنيگٸ.
مينيسترلٸكتٸڭ دەرەگٸ بويىنشا 2026 جىلدىڭ العاشقى التى ايىندا 1885 ەسٸرتكٸ قىلمىسىنىڭ جولى كەسٸلٸپ, 6 ۇيىمداسقان قىلمىستىق توپتىڭ قىزمەتٸ توقتاتىلدى. سونداي-اق 9 ۇيىمداستىرۋشى مەن 29 بەلسەندٸ قاتىسۋشى ۇستالدى جەنە 15 مىڭنان استام زاڭسىز ينتەرنەت-رەسۋرس بۇعاتتاۋعا جولداندى.
