Ózbekstannyń burynǵy prezidenti Islam Karimovtyń úlken qyzy Gúlnara Karimovanyń uly, kishi Islam Karimov bas prokýratýrany anasyna qatysty qylmystyq isti qoldan jasap otyr dep aiyptady. BBC-ge bergen, 1 tamyzda jariialanǵan suhbatynda kishi Islam Karimov anasyna jala jabylyp otyr dedi.
28 shildede Ózbekstan bas prokýratýrasy Karimovanyń qamaýda ekenin habarlaǵan. Prokýratýranyń aqparaty boiynsha, 2015 jyly tamyzda Tashkent oblystyq qylmystyq ister soty Karimovanyń bas erkindigin bes jylǵa shektegen. Qazir oǵan qatysty qylmystyq kodekstiń basqa baby boiynsha tergeý jalǵasyp jatyr.
Kishi Islam Karimov sózinshe, óziniń anasyna qarsy málimdemelerdiń bári "burmalanǵan, qoldan jasalǵan". "Qoldarynan kelgen barlyq jalany, barlyq jymqyrylǵan qarajatty, barlyq minstrlikten meniń anama jaýyp otyr: ony qamap ózderi sútten aq bolyp shyǵyp, jumysyn ári qarai istei bermekshi", - dedi ol.
Burynǵy prezident jieniniń aitýynsha, Gúlnara Karimovaǵa telingen aktivter, (iste 2 milliard dollar kóleminde qarjy jymqyrǵany aitylady) shyn máninde anasyniki emes jáne Karimovanyń týystary Ózbekstan sheneýnikteriniń ahýaly jaily úlken qujatty jariialaýǵa daiyndalyp jatyr.
Karimovanyń uly BBC-ge 1 tamyzda qolyna tigen sot qujatynyń 3 shildede daiyndalǵanyn, qujatta anasynyń túrmege aýystyrylǵany habarlanǵanyn aitady. Bul qujattyń rastyǵyn anyqtaý múmkin bolmai tur.
