QR Premer-Ministri Asqar Maminniń tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń (VAK) selektorlyq otyrysy ótti, dep habarlaidy "Ult aqparat".
QR Prezidenti Qasym-Jomart Toqaevtyń tapsyrmasyna sáikes COVID-19-ben kúresýdiń qosymsha sharalary qaraldy.
Elimizdegi sanitarlyq-epidemiologiialyq ahýal týraly Densaýlyq saqtaý ministri Aleksei Tsoi, zerthanalyq qyzmetter men jeke qorǵaný quraldarynyń baǵa saiasatyna monitoring júrgizý jumysy týraly Básekelestikti qorǵaý jáne damytý agenttiginiń tóraǵasy Serik Jumanǵarin, sanitarlyq talaptardyń saqtalýyn baqylaý týraly Ishki ister ministri Erlan Turǵymbaev, aqparattyq-túsindirý jumysy týraly Aqparat jáne qoǵamdyq damý ministri Aida Balaeva, óńirlerdegi ahýal týraly Soltústik Qazaqstan oblysynyń ákimi Qumar Aqsaqalov pen Pavlodar oblysynyń ákimi Ábilqaiyr Sqaqov baiandady.
Qazaqstanda biylǵy 18 qazandaǵy jaǵdai boiynsha koronavirýsty juqtyrǵan 102 adam tirkeldi (ósý qarqyny – 0,09%), juqpaly aýrýlarǵa arnalǵan tósek-oryndardyń 16%-y paidalanylýda. 2020 jylǵy 14-18 qazan aralyǵyndaǵy reprodýktivtilik kórsetkishi 1,03%-dan 0,96%-ǵa deiin tómendedi. Sońǵy 3 aptada elimizde 17 myńǵa jýyq reid júrgizilip, 7 myńnan astam karantin rejimin buzý faktisi anyqtaldy.
Úkimet basshysy turǵyndar áli kúnge deiin koronavirýs qaýpinen tolyq saqtanbaitynyn, áleýmettik ara qashyqtyqty saqtaý rejimi men ásirese, qoǵamdyq oryndar men kólikterde mindetti túrde maska taǵý máselesinde sanitarlyq talaptardyń jetkilikti saqtalmaitynyn atap ótti. Osyǵan bailanysty Úkimet basshysy azamattar arasynda aqparattyq-túsindirý jumystaryn jandandyrýdy jáne sanitarlyq talaptardyń saqtalýyn baqylaýdy kúsheitýdi tapsyrdy.
Osyǵan orai, Vedomstvoaralyq komissiia karantindik talaptarǵa qatysty birqatar sheshim qabyldady:
I. Shekaradan ótkizý pýnktterinde sanitarlyq-epidemiologiialyq baqylaý kúsheitiledi
- 2020 jylǵy 26 qazannan bastap shet elderdegi epidemiologiialyq ahýaldy eskerýmen shetelge ushatyn áýe reisteriniń sany qysqartylady;
- Qazaqstan aýmaǵyna kelgenderdiń barlyǵy (sonyń ishinde QR azamattary), sondai-aq ekijaqty halyqaralyq tasymaldardy júzege asyratyn júrgizýshiler mindetti PTR-testileýden ótkiziledi;
- shetelden kelýshilerge, onyń ishinde QR azamattary úshin de PTR-testileýden ótkeni týraly anyqtamanyń jaramdylyq merzimi 3 kúnge deiin belgilendi.
II. PTR-testileý
2020 jylǵy 19 qazannan bastap QR óńirlerindegi zerthanalarda PTR-testileý quny 9 myń teńgege deiin tómendetildi.
III. Syrqattanýshylyq ósimi bolmaǵan jaǵdaida, turaqty epidemiologiialyq ahýaly bar «jasyl» óńirlerde biznes sýbektileriniń qyzmeti kezeń-kezeńimen qaita jandandyrylady;
- 2020 jylǵy 24 qazannan bastap senbi kúnderi saǵat 17:00-ge deiin SOSO, saýda úileri, jabyq bazarlar jumys istei bastaidy;
- biylǵy 26 qazannan bastap kinoteatrlar qashyqtyqty jáne maska taǵý rejimin saqtai otyryp, 30%-dan aspaityn tolyǵýmen jumysyn qaita bastaidy.
IV. Shekteý sharalaryn saqtaý
Mektepke deiingi balalar mekemeleriniń, biliard jáne kompiýter klýbtarynyń, oiyn-saýyq mekemeleriniń, banket zaldarynyń, túngi klýbtardyń qyzmetine salynǵan tyiym saqtalady;
- oblysaralyq jolaýshylar tasymaldaryna jáne ortaq vagondardy qurýǵa tyiym salý jalǵasady.
