Atyraýda burynǵy áieliniń jaqyn týystaryn óltirdi degen kúdikke ilingen Sultan Sársemálievti advokat Asan Jumabaev tegin qorǵap jatqanyn aitty, dep habarlaidy ult.kz.
Bul týraly advokat jýrnalist Janat Jaqsybaiqyzyna bergen suhbatynda málimdedi. Onyń sózinshe, advokat zań aiasynda qaiyrymdylyq jáne qoǵamdyq negizde tegin quqyqtyq kómek kórsete alady.
"Advokattyń óziniń quqyǵy bar. Qaiyrymdylyq ári qoǵamdyq negizde advokat tegin qyzmet kórsete alady. Men sol negizde tegin qyzmet kórsetip otyrmyn. Áleýmettik kómek qaiyrymdylyq negizde kórsetilip jatyr", – dedi Asan Jumabaev.
Advokattyń aitýynsha, sottalýshy Sultan Sársemáliev sot barysynda kinásin tolyq moiyndaǵanymen, sottyń zańdy sheshimi shyqpaiynsha ony kináli dep ataýǵa bolmaidy. Jýrnalister osyǵan qatysty birneshe ret suraq qoiǵanymen, Jumabaev óz ustanymynan taimady.
Sondai-aq ol qorǵaýyndaǵy azamatqa qarsy jaýap bermeitinin aityp, advokat retinde óz mindetin zań aiasynda atqaryp jatqanyn jetkizdi.
