Qazaqstandaǵy KIMEP ýniversitetinde oqytýshylarǵa qatysty daý qoǵam nazaryn aýdardy. Áleýmettik ǵylymdar kolledjiniń dekany Djeison Geinos qyzmetinen ketip, stýdentterdi oqytýshylar tarapynan jynystyq qysym kórsetý faktileri bolsa, olardy jariia etýge shaqyrdy, dep habarlaidy ult.kz.
Vremia basylymynyń jazýynsha, ýniversitette bir jylǵa jetpeitin ýaqyt jumys istegen Geinos stýdentterge joldaǵan qoshtasý hatynda basshylyq tarapynan qysym kórgenin málimdegen.
Onyń aitýynsha, ýniversitet basshylyǵy buryn jynystyq qysym kórsetý daýyna bailanysty aty atalǵan professor Nadim Nakvimen eńbek kelisimshartyn uzartýdy talap etken. Alaida Geinos bul sheshimmen kelispei, qyzmetinen ketýdi tańdaǵan.
Hatta Geinos Nadim Nakvidiń 1999 jyly AQSh-taǵy Djordjiia ýniversitetinen stýdentterge qatysty jynystyq qysym kórsetýge bailanysty jumystan shyǵarylǵany jónindegi aqparatty keltirgen. Osy jaitqa bailanysty ol KIMEP basshylyǵyn máseleni muqiiat qarastyrýǵa shaqyrǵanyn aitqan. Biraq oǵan atalǵan oqiǵanyń shamamen 30 jyl buryn bolǵany jáne qazirgi qyzmetine qatysy joq ekeni jetkizilgen.
Geinostyń málimdeýinshe, ýniversitet basshylyǵy daýly máseleni qozǵamaýdy surap, Nakvimen jańa kelisimshart jasaýǵa kóndirýge tyrysqan.
Osydan keiin ol stýdentterdi harassment faktilerin jasyrmai, jariia túrde kóterýge úndegen. Keiin hat áleýmettik jelilerde tarap, keń qoǵamdyq talqylaýǵa sebep boldy.
Ázirge KIMEP ýniversiteti bul jaǵdaiǵa qatysty resmi málimdeme jasaǵan joq.
Aita keteiik, Nadim Nakvi ýniversitette 2013 jyldan beri jumys isteidi. Al KIMEP oqý orny 1992 jyldan beri jumys istep keledi jáne halyqaralyq bilim berý modelin qoldanady.
