Vetnam astanasy Hanoida ótken AQSh prezidenti Donald Tramp pen Soltústik Koreia basshysy Kim Chen Yn kezdesýi kelisimsiz aiaqtaldy. Taraptar Korei túbegin iadrolyq qarýsyzdandyrý boiynsha kelisimge qol jetkize almaǵan. Biraq "Vashington men Phenian arasyndaǵy kelissózder bolashaqta jalǵasady" dep habarlady Aq úi.
"Qazir eshqandai kelisim jasalǵan joq, biraq taraptar aldaǵy ýaqytta máseleni talqylaýǵa ázir" dep habarlady Aq úi baspasóz hatshysy Sara Sanders aqpannyń 28-i kúni tústen keiin. Sanderstiń sipattaýynsha, Tramp pen Kim arasyndaǵy kezdesý "óte jaqsy ári konstrýktivti" ótken.
Eki el basshylary sammit ótken qonaq úiinen jeke kólikterimen josparlanǵan ýaqyttan erterek ketken. Al aldyn ala josparlanǵan ortaq kelisimge qol qoiý rásimi bolmaidy dep habarlandy.
Sammittiń ekinshi kúni túske deiin AQSh prezident Donald Tramp iadrolyq qarýsyzdandyrý máselesi boiynsha kelisimge qol jetkizýde asyǵystyq jasamaitynyn jetkizgen edi.
“Áý bastan-aq maǵan jyldamdyq mańyzdy emes dep aitqanmyn. [Soltústik Koreianyń] Iadrolyq qarý men zymyrandardy synaqtan ótkizbeýin joǵary baǵalaimyn” dep aitqan.
Tramppen kezdesý barysynda Kim alǵash ret shetel jýrnalisiniń suraǵyna jaýap bergen. "Kelisimniń bolatynyna senimdisiz be?" degen Washington Post tilshisiniń suraǵyna Soltústik Koreia basshysy:
"Bir nárse aitýǵa áli erterek, biraq pessimistpin dep aita almaimyn. Jaqsy nátijege qol jetkizemiz degen oidamyn. Biz kóp kúsh saldyq, nátijesin kórsetetin mezgil jetti" degen.
Buǵan deiin aqparat quraldary sammit sońynan Tramp pen Kimniń kelisimge qol qoiatynyn, taraptardyń optimistik kózqaras tanytyp otyrǵanyn jazǵan. Biraq qol qoiý rásimine az ýaqyt qalǵanda rásimniń bolmaityny aityldy.
Reuters habarlaýynsha, Tramp pen Kim kelissóz barysynda ózara iadrolyq qarýsyzdaný sharalary atap aitqanda, Soltústik Koreianyń Ionbendegi iadrolyq reaktordyń joiylýyn baqylaýǵa ruqsat berý siiaqty máseleni talqylaǵan. Eki el basshylary 1950-53 jylǵy Koreia soǵysynyń aiaqtalýyna bailanysty saiasi málimdeme jasaý múmkindigin de qarastyrǵan.
"Amerika daýysy" saitynyń habarlaýynsha, Hanoidaǵy "Metropol" qonaq úiinde búgin sessiia bastalmas buryn eki el basshylary jeke sóilesken. Jýrnalister Kim Chen Ynnyń Trampty kelissóz júrgizý úshin alǵashqy qadam jasap, "batyrlyq tanytqany úshin" maqtaǵanyn estigen. Sammittiń ekinshi kúni Donald Tramp "Biz jetistikke qol jetkizdik jáne eń bastysy qarym-qatynasymyz jaqsy" dep Kimmen "jyly qarym-qatynasyn" atap ótken.
Soltústik Koreia 2017 jyldyń sońynan beri qurlyqaralyq ballistikalyq zymyrandaryna synaq jasamaǵan. Tramp bul joly da "eger kelisim jasalsa" Soltústik Koreianyń qýatty elge ainalý múmkindigi baryn qaitalaǵan.
AQSh-Soltústik Koreia sammiti Vetnam astanasy Hanoida aqpannyń 27-si kúni bastalǵan. Bul kúni eki el basshylary jýrnalister aldynda qysqa kezdesý ótkizip, sońynan keshki as ishken. Kelissózdiń negizgi bóligi 28 aqpanda ótken.
Ótken jylǵy Singapýrdaǵy alǵashqy sammitte Tramp pen Kim Korei túbegin iadrolyq qarýdan tolyq aryltý jóninde birlesken deklaratsiiaǵa qol qoiǵan. Alaida keiinirek aqparat quraldary Soltústik Koreianyń iadrolyq qarýyn qaita kúsheitip jatqanyn jazǵan. Reuters agenttigi taraptar optimizmine qaramastan iadrolyq qarýsyzdaný máselesi boiynsha segiz ai ishinde ilgerileýshilik baiqalmaǵanyn jazdy.
