Kievtegi telemunaraǵa tigen zymyran soqqysy Qazaqstannyń Ýkrainadaǵy elshiliginen 800 metr jerde bolǵan. Bul týraly Qazaqstannyń Ýkrainadaǵy tótenshe jáne ókiletti elshisi Darhan Káletaev aitty, - dep habarlaidy Tengrinews.kz agenttigi.
"Túnde elshilikten 800 metr qashyqta telemunara mańynda jarylys boldy. Qazir ony barlyq jerden kórsetip jatyr. Lýkianovka aýdany bizge jaqyn ornalasqan, túni boiy atys daýysy estildi. Azamattar jertólede boldy. Qazaqstandyqtar arasynda zardap shekkender joq", - dedi elshi.
Qazaqstannyń Kievtegi elshiliginiń qaýipsizdigi týraly suraqqa Káletaev diplomattardy Ýkraina Ulttyq ulanynan úsh adam qorǵaitynyn aitty.
"Meniń oiymsha, elshilikke eshkim tiispeidi. Eń bastysy, snariad túspese boldy", - dedi elshi.
Darhan Káletaev tótenshe jaǵdai kezinde Qazaqstan elshiligin evakýatsiialaýǵa qatysty másele qarastyrylmaitynyn aitty.
"Qazir ketip qalsaq, Otanyna oralyp úlgermegen qazaqstandyqtar ne isteý kerek? Qazir, mysaly, avtobýs ketýine bir saǵat qalǵanda, adamdar qońyraý shalyp, ne isteý kerek ekenin suraidy. Óitkeni adamdar túrli jerde júr. Kóptegen adam Kievte bizge jete almai otyr. Biz ketip qalsaq, olar ne isteidi?", - dep málimdedi ol.
Sondai-aq, elshi Ýkrainanyń Sýmy qalasyndaǵy qazaqstandyq stýdent Denis Ternovke qatysty jaǵdaidy aitty. Káletaevtyń aitýynsha, diplomattar ony jergilikti otbasylardyń birine ornalastyrǵan.
"Qazaqstannyń belsendileri, bastamashyl toptary qazir Denisti Otanǵa jetkizýdiń túrli joldaryn izdestirip jatyr. Tipti Halyqaralyq uiymdarǵa júginip jatyr. Qazir bul óte qaýipti ekenin aitqym keledi. Atys bolyp jatyr. Ol qaýipsiz, jaqsy otbasynda. Olarmen bailanystamyz", - dep túiindedi elshi.
