13 mamyrda Kievte beibit turǵyndy atyp óltirdi dep aiyptalǵan reseilik tankistiń soty bastaldy. Bul - Resei Ýkrainaǵa basyp kirgeli beri orys soldattarynyń áreketine qatysty ótip otyrǵan alǵashqy sot, dep habarlaidy Azattyq.
Tergeý organdarynyń málimetinshe, serjant Vadim Shishmarin biyl 28 aqpanda velosiped aidap bara jatyp, telefonmen sóilesken 62 jastaǵy er adamnyń basynan atyp óltirgen. Bul oqiǵa Ýkrainanyń soltústik-shyǵysyndaǵy Sýmskaia oblysynyń Chýpahovka poselkasynda bolǵan.
21 jastaǵy Shishmaringe Ýkraina Qylmystyq kodeksiniń "Soǵys zańy men erejelerin buzý" baby boiynsha aiyp taǵylyp otyr. Onyń qandai jaǵdaida tutqynǵa túskeni jáne kinásin moiyndaityny-moiyndamaityny jaily aqparat joq.
13 mamyrda sot otyrysy bir saǵatqa jetpei aiaqtaldy. Sýdia protsestiń ashyq ótetinin aityp, 18 mamyr kúni qaralatyn istiń tártibin bekitti.
Ýkraina biligi Resei áskerin kóptegen qylmystarǵa (beibit turǵyndardy óltirý, tonaý, zorlaý jáne taǵy basqa) aiyptaidy. Ýkraina bas prokýrory Irina Venediktova 600-den astam kúdikti qatysqan 10,7 myńnan astam áskeri qylmysty tergeitinin málimdedi.
Halyqaralyq qylmystyq sot ta yqtimal áskeri qylmystar boiynsha tergeý júrgizip jatyr. BUU Adam quqyqtary keńesi jýyrda Kiev túbindegi áskeri qylmystardy zertteýdi talap etetin qarar qabyldaǵan. Qararda BUU ókilderi qujatqa túsirgen adamdardy atyp óltirý, azaptaý, jynystyq zorlyq-zombylyq jáne ózge de qatigez áreketter baiandalǵan.
Ýkraina biliginiń málimetinshe, Kiev oblysynda bir aiǵa sozylǵan okkýpatsiia kezinde Resei áskeri shamamen myń beibit turǵyndy óltirgen. Wall Street Journal beisenbi kúni Kiev mańyndaǵy "ajal súrleýi" atanyp ketken aýmaqta ondaǵan adamnyń qazasy týraly zertteý jariialady. Resei áskeri jolda ótip bara jatqan beibit turǵyndardyń kólikterine oq atqan.
Reseide de ýkrain áskerilerine qarsy qylmystyq ister qozǵalǵan. Olarǵa Donbastaǵy beibit turǵyndarǵa oq atty degen aiyptar taǵylǵan. Osy aptada tergeý komitetiniń tórt ýkrain soldatyna aiyp taqqany habarlandy.
