Kiev soty Resei áskeriniń serjanty Vadim Shishimarindi qarýsyz adamdy qasaqana óltirip, zań men soǵys dástúrin buzǵany úshin ómir boiyna bas bostandyǵynan aiyrdy, dep habarlaidy Azattyq.
Buǵan deiin Ýkraina prokýratýrasy da Máskeý oblysynyń Kantemirovsk tank diviziiasynyń 21 jastaǵy bólim komandirin ómir boiyna túrmege qamaýdy suraǵan.
Tergeý málimetine qaraǵanda, biyl 28 aqpanda Resei serjanty 62 jastaǵy beibit adam Aleksandr Shelipovty basynan atyp óltirgen. Bul oqiǵa Sýmsk oblysynyń Chýpahovka kentinde bolǵan.
Sottyń sońǵy otyrysynda Shishimarin kinásin moiyndap, jasaǵan áreketterin aityp berýge kelisken.
Azattyq radiosynyń Ýkrain redaktsiiasynyń jazýyna qaraǵanda Vadim Shishimarin "qarýsyz adamdy nege attyń" degen sýdialar suraǵyna "óltirgisi kelmegenin, ózinen aýlaq ketirý úshin ǵana atqanyn" aitqan. "Praporshik Makeev atyp tasta dep buiryq berdi. Men bas tarttym. Taǵy bir áskeri qyzmetker atyp tasta dep óktem daýyspen buiyrdy, áitpese "bizdi satyp ketesiń" dedi. Sodan soń attym", – dep jaýap bergen.
Ólgen adamnyń sotta sóilegen jesiri Ekaterina Shelipova da kináli serjantty ómir boiyna bostandyǵynan aiyrýdy suraǵan, biraq "Azovstaldi" qorǵaǵan Ýkraina jaýyngerlerine aiyrbastasy qarsy bolmaitynyn" aitqan.
"Serjantqa Ýkraina bekitken advokat sózinshe, Resei sheneýnikteri nemese Resei Qorǵanys ministrliginiń eshbir ókili Shishimarinmen sóilesýge tyryspaǵan" deidi Bi-bi-si.
Vadim Shishimarin isi – biyl 24 aqpanda Resei Ýkrainaǵa basyp kirgeli Resei jaýyngerleriniń qylmysyna bailanysty alǵash bolǵan sot protsesi.
