Kollaj: Ult.kz
Memleket basshysy telekópir arqyly KIA Qazaqstan avtomobil zaýytyn ashty. Prezident Qasym-Jomart Toqaev is-sharaǵa qatysýshylardy zaýyttyń ashylýymen quttyqtap, bul elimizdegi mashina jasaý salasyn damytý baǵytyndaǵy óte mańyzdy qadam ekenine nazar aýdardy, dep habarlaidy Ult.kz Aqordaǵa silteme jasap.
Memleket basshysy osydan eki jyl buryn Qostanaiǵa sapary kezinde KIA Sportage avtokóliginiń óndirisi iske qosylǵanyn eske saldy. Búgin Kia Motors korporatsiiasymen jasalǵan kelisimge sáikes zaýyt ashyldy.
Qasym-Jomart Toqaev KIA Corporation prezidenti Ho-sýng Songqa jáne kompaniiaǵa shynaiy rizashylyǵyn bildirip, aýqymdy jumys atqarylǵanyn, nátijesinde ózara tiimdi jáne jemisti bailanys nyǵaia túskenin atap ótti.
"Jalpy, búgingi aitýly oqiǵa Qazaqstan men Koreia arasyndaǵy strategiialyq seriktestik pen tabysty qarym-qatynastyń jarqyn kórinisi ekeni anyq. Koreia Respýblikasy – Qazaqstannyń Aziiadaǵy senimdi áriptesi. Biz yntymaqtastyǵymyzdy kúsheite túsýge múddelimiz. Qazir Qazaqstanda Koreianyń 800-den astam kompaniiasy tabysty jumys istep jatyr. Sonyń ishinde avtokólik jasaý salasyn ózara tiimdi yqpaldastyq kózi dep aitýǵa tolyq negiz bar. Búgin ashylyp jatqan biregei zaýyt – sonyń aiqyn dáleli. KIA korporatsiiasy avtomobil shyǵaratyn álemdegi 10 iri kompaniianyń qataryna kiredi. Sondai-aq KIA – Qazaqstan azamattary eń kóp satyp alatyn úsh kólik markasynyń biri. KIA brendiniń ataýy «kóterilip kele jatqan» jáne «Aziia» degen eki ierogliften quralýynyń simvoldyq máni bar. Shyn máninde, kompaniia Aziianyń jańa ekonomikalyq órleýi men gúldenýiniń jarqyn kórinisine ainaldy. KIA – keleshektiń korporatsiiasy. Kásiporyn shyǵaratyn avtokólikterde ozyq tehnologiia, tartymdy dizain jáne joǵary deńgeidegi senimdilik úilesim tapqan, – dedi Prezident.
Qasym-Jomart Toqaev KIA kompaniiasy áleýmettik jaýapkershilik aiasynda adam kapitalyn damytýǵa belsendi túrde investitsiia salyp kele jatqanyna toqtaldy.
"Álemdik avtoalpaýyt elimizdegi zaýytty iske qospai turyp, Qazaqstan jáne Koreia ýniversitetterimen, kolledjderimen uzaq merzimdi yntymaqtastyqty jolǵa qoia bastady. Budan bólek, bilikti kadrlardy daiarlaý úshin kompaniia korporativtik oqý ortalyǵyn ashýdy josparlap otyr. KIA osy arqyly qyzmetkerlerge qamqorlyq – uiym mádenietiniń mańyzdy bólshegi ekenin kórsetedi. Bul shynaiy qurmet pen niettestik ortasyn qalyptastyrady. Jumysshy mamandarǵa dál osyndai qarym-qatynas qoǵamda eńbekqorlyq pen áleýmettik ádildik qundylyqtarynyń ornyǵýyna septigin tigizedi. Zaýytta óndiris lokalizatsiiasyna ekpin qoiylyp otyr. Bul shyǵarylatyn ónimdegi qazaqstandyq úlesti edáýir arttyrýǵa múmkindik beredi. Sarapshylardyń esebinshe, avtozaýyttaǵy árbir jumys orny logistika, servis, infraqurylym salalarynda janama túrde bes-alty adamdy jumyspen qamtýǵa yqpal etedi. Bul – jai ǵana óndiris jelisiniń keńeiýi emes, tolyq ónerkásip klasterin qalyptastyrý úshin jasalǵan zor qadam. Mundai júiede shaǵyn jáne orta biznes turaqty damýǵa múmkindik alady. Óndiristi uiymdastyrýdyń osyndai keshendi tásili Qostanai oblysynyń ǵana emes, tutas elimizdiń indýstriialyq áleýetin kúsheitedi. KIA zaýyty qazaqstandyq avtoónerkásiptiń órkendeýine tyń serpin beretinine senimdimin. Jańa kásiporynnyń jumysy otandyq avtoparktiń jańarýyna septigin tigizedi. Ol qalalar men kúre joldardaǵy jol qozǵalysy qaýipsizdigine oń áser etedi, – dedi Memleket basshysy.
Prezident memlekettiń mashina jasaý salasyna basa mán beretinin jetkizdi.
"Byltyr osy salaǵa 290 milliard teńgeden astam investitsiia tartyldy. Bul – aldyńǵy jylmen salystyrǵanda eki jarym ese kóp. Osy úrdis biyl da jalǵasýda. Jyl basynan beri osy salaǵa 178 milliard teńge qarajat salyndy. Investorlar Qazaqstanǵa zor qyzyǵýshylyq tanytyp otyr. Aýqymdy sharalardyń nátijesinde bul baǵytta birqatar tabysqa qol jetkizdik. Ótken jyly elimizde 145 myńnan astam kólik shyǵaryldy. Astana, Almaty, Semei, Oral, Kókshetaý, Qostanai jáne Saran qalalarynda avtokólik óndirisine qatysty kásiporyndar jumys istep tur. On myńnan astam azamatymyz osy salada eńbek etedi. Onyń jartysyna jýyǵy – jastar. Al Qostanaidaǵy zaýytta bir jarym myń adam jumys isteitin bolady. Jumysshylar jańa daǵdylardy igerip, bilikti maman retinde qalyptasady. Aldaǵy ýaqytta kásiporyn injenerlerdiń naǵyz sheberhanasy bolady dep senemin", – dedi Qasym-Jomart Toqaev.
Memleket basshysy: «Endi azamattarǵa avtokólikti lizingpen alý múmkindigi usynylady»
Prezident jaqynda Úkimetke ekonomikalyq ahýaldy turaqtandyrý úshin naqty sharalar ázirleý týraly tapsyrma berilip, osyǵan bailanysty birqatar mańyzdy sheshim qabyldanǵanyn aitty.
"Soǵan sáikes endi azamattarǵa avtokólikti lizingpen alý múmkindigi usynylady. Sonyń arqasynda avtokólikter halyqqa meilinshe qoljetimdi bola túspek. Elimizde KIA Qazaqstan zaýytynyń iske qosylýy osy salany tehnologiialyq turǵydan jańǵyrtýǵa zor serpin bereri sózsiz. Kásiporyn bolashaqta basqa da jańa kólik túrlerin shyǵarady dep senemin. Osylaisha, álemdik ozyq talaptarǵa sai kólikterimizdi syrtqy naryqqa, iaǵni shetelge shyǵarýǵa múmkindik bolmaq. Qazaqstan jahandyq avtokólik ónerkásibiniń damýyna bar kúsh-jigerin salýǵa daiyn", – dedi Prezident.
KIA Qazaqstan zaýytyn salý týraly sheshim 2023 jyly qabyldandy. Kásiporyn Qostanai qalasynyń indýstriialyq aimaǵyndaǵy 62,95 gektar aýmaqta ornalasqan. Zaýyt jylyna 70 myń kólik óndire alady. Investitsiia kólemi – 131,5 milliard teńge. Kásiporynda 1500 jumys orny ashylǵan. Al onyń ónimi Qazaqstanǵa, Ortalyq Aziia jáne EAEO elderiniń naryqtaryna shyǵarylady.
Sondai-aq memleket basshysy Qasym-Jomart Toqaev KIA Corporation prezidenti Ho-sýng Songty II dárejeli «Dostyq» ordenimen marapattady.
"Biz Sizdiń qazaq-korei yntymaqtastyǵynyń damýyna, qos halyqtyń arasyndaǵy dostyqtyń nyǵaiýyna qosqan úlesińizdi joǵary baǵalaimyz. Shyn máninde, elimizdiń avtokólik salasyn damytýǵa sińirgen eńbegińiz mol", – dedi Prezident.
