Búgin astanalyq «Barys» Qurlyqtyq hokkei ligasy aiasynda Reseide «Avtomobilist» (Ekaterinbýrg) komandasymen kezdesti, dep habarlaidy "Ult aqparat".
Eki komanda da plei-off kezeńine shyǵýǵa kúsh salyp keledi. Aita keteiik, «Barys» sońǵy 14 kezdesýdiń 11-inde jeńiske jetti. Al «Avtomobilist» sońǵy 7 oiynda nebári 2 ret jeńildi. Sol sebepti búgingi oiyn tartysty ótetini anyq edi.
Kezdesýdi elordalyq hokkeishiler senimdi bastady. Nátijesinde birinshi kezeńde «Barys» eki shaiba soǵyp úlgerdi. Alǵashqysynda Roman Starchenko 3-minýtta mergendik tanytsa, 10-minýtta Iakob Lilia kózdegen nysanadan múlt ketken joq.
Ekinshi kezeńniń 23-minýtynda elordalyq Kirill Paniýkov esepti ústemelei tústi. Al 37-minýtta «Avtomobilist» hokkeishisi Anatolii Golyshev esep aiyrmasyn qysqartty.
Úshinshi kezeńde reseilik hokkeishiler «Barys» qaqpasy mańynda jii boi kórsetti. Oǵan qazaqstandyq oiynshylar laiyqty toitarys kórsete bildi.
Sońǵy bes minýtta aidyn ieleri oiynshy sanynyń basymdyǵyna ie boldy. Sol sátte Kertis Volk tártip buzǵan edi.
Al 57-minýtta «Avtomobilist» sapynan Piter Holland gol soǵyp ketti.
Kezdesý nátijesinde «Barys» qarsylasyn 3:2 esebimen jeńdi.
Bul jeńisten keiin elordalyq klýb týrnir kestesinde 13-orynǵa kóterildi.
Aita keteiik, «Barys» budan keiin úsh oiyndy óz alańynda ótkizedi. Aldymen 12 qańtarda elordada Reseidiń «Ak Bars» komandasyn qabyldasa, odan keiin 14 qańtarda «Salavat Iýlaev», 17 qańtarda «Amýr» klýbtarymen kezdesedi.
