بٷگٸن استانالىق «بارىس» قۇرلىقتىق حوككەي ليگاسى اياسىندا رەسەيدە «اۆتوموبيليست» (ەكاتەرينبۋرگ) كومانداسىمەن كەزدەستٸ, دەپ حابارلايدى "ۇلت اقپارات".
ەكٸ كوماندا دا پلەي-وفف كەزەڭٸنە شىعۋعا كٷش سالىپ كەلەدٸ. ايتا كەتەيٸك, «بارىس» سوڭعى 14 كەزدەسۋدٸڭ 11-ٸندە جەڭٸسكە جەتتٸ. ال «اۆتوموبيليست» سوڭعى 7 ويىندا نەبەرٸ 2 رەت جەڭٸلدٸ. سول سەبەپتٸ بٷگٸنگٸ ويىن تارتىستى ٶتەتٸنٸ انىق ەدٸ.
كەزدەسۋدٸ ەلوردالىق حوككەيشٸلەر سەنٸمدٸ باستادى. نەتيجەسٸندە بٸرٸنشٸ كەزەڭدە «بارىس» ەكٸ شايبا سوعىپ ٷلگەردٸ. العاشقىسىندا رومان ستارچەنكو 3-مينۋتتا مەرگەندٸك تانىتسا, 10-مينۋتتا ياكوب ليليا كٶزدەگەن نىسانادان مٷلت كەتكەن جوق.
ەكٸنشٸ كەزەڭنٸڭ 23-مينۋتىندا ەلوردالىق كيريلل پانيۋكوۆ ەسەپتٸ ٷستەمەلەي تٷستٸ. ال 37-مينۋتتا «اۆتوموبيليست» حوككەيشٸسٸ اناتوليي گولىشەۆ ەسەپ ايىرماسىن قىسقارتتى.
ٷشٸنشٸ كەزەڭدە رەسەيلٸك حوككەيشٸلەر «بارىس» قاقپاسى ماڭىندا جيٸ بوي كٶرسەتتٸ. وعان قازاقستاندىق ويىنشىلار لايىقتى تويتارىس كٶرسەتە بٸلدٸ.
سوڭعى بەس مينۋتتا ايدىن يەلەرٸ ويىنشى سانىنىڭ باسىمدىعىنا يە بولدى. سول سەتتە كەرتيس ۆولك تەرتٸپ بۇزعان ەدٸ.
ال 57-مينۋتتا «اۆتوموبيليست» ساپىنان پيتەر حوللاند گول سوعىپ كەتتٸ.
كەزدەسۋ نەتيجەسٸندە «بارىس» قارسىلاسىن 3:2 ەسەبٸمەن جەڭدٸ.
بۇل جەڭٸستەن كەيٸن ەلوردالىق كلۋب تۋرنير كەستەسٸندە 13-ورىنعا كٶتەرٸلدٸ.
ايتا كەتەيٸك, «بارىس» بۇدان كەيٸن ٷش ويىندى ٶز الاڭىندا ٶتكٸزەدٸ. الدىمەن 12 قاڭتاردا ەلوردادا رەسەيدٸڭ «اك بارس» كومانداسىن قابىلداسا, ودان كەيٸن 14 قاڭتاردا «سالاۆات يۋلاەۆ», 17 قاڭتاردا «امۋر» كلۋبتارىمەن كەزدەسەدٸ.
